BǴM balabaqshalarǵa qoiylatyn talaptardy kúsheitip jatyr. Bul týraly bilim jáne ǵylym ministri Ashat Aimaǵambetov Telegram arnasynda jazdy, - dep habarlaidy "Ult aqparat".
Ministrdiń aitýynsha, ornatylǵan beinekameralardyń arqasynda qoǵam balalardyń quqyqtary buzylǵan faktiler týraly habardar otyr. Bul balabaqshalarǵa qoiylatyn talaptardy kúsheitý qajettiligi týraly ustanymymyzdyń ózektiligin rastaidy.
"On jyldan astam ýaqyt buryn balabaqshalar sanynyń jyldam ósýin yntalandyrý úshin litsenziialaýdan, keiin memlekettik baqylaýdan, monitoringten jáne olardyń qyzmetin retteýden bas tartý týraly sheshim qabyldandy. Ol qandai nátije berdi?
Jekemenshik balabaqshalar sany kúrt artyp, 3 jastan 6 jasqa deiingi balalar birden 99%-ǵa deiin qamtyldy. Bul - jaqsy nátije. Alaida balabaqshalar sanyn kóbeitýge múmkindik bolsa da, sapa máselesi ózekti bolyp qala beredi. Balabaqshalardyń jartysy tehnikalyq jáne sanitarlyq talaptarǵa sai kelmeitin ǵimarattarda, bilikti mamandarsyz jáne qaýipti jaǵdailarda ashylǵan. Mundai faktiler jetkilikti" - dep jazdy ol.
Ministr eki jyl buryn litsenziialaý men memlekettik baqylaýdy qaitarýǵa áreket jasaǵandaryn aitty. Alaida sol kezde kásipkerler palatasy, balabaqshalar qaýymdastyǵy jáne birqatar memlekettik organ ustanymy bul normany zańǵa engizýge múmkindik bermegen.
"Biraq biz bul baǵytta jumysty toqtatpadyq. Byltyrdyń sońynda memlekettik attestattaý júiesin engize aldyq. Attestatsiia nátijesi kóńilden shyqpady. Tekseristen ótken balabaqshalardyń 80%-y memlekettik attestatsiiadan óte almady.
Áńgime balabaqshadaǵy búldirshinderge qolaily jaǵdai jasalmaýy, oqý-tárbie jumystarynyń memlekettik bilim berý standartyna, qaýipsizdik tehnikasy, órt jáne sanitarlyq normalardyń talaptarǵa sáikes kelmeýi, tárbieshilerdiń qol kóterýi jáne basqa da keleńsiz faktiler týraly bolyp otyr" - deidi ministr.
Vedomstvo bes negizgi baǵyt boiynsha jumys istep jatyr:
1. Litsenziialaýdy qaitarý. Bul másele boiynsha depýtattardyń, qoǵam men memlekettik organdardyń qoldaýyna úmit artamyz.
2. Jumys jaǵdailary men sapasyn tekserip, barlyq balabaqshany attestatsiialaýdan ótkizý.
3. Balabaqshalarǵa memlekettik tapsyrystardy ornalastyrýǵa qoiylatyn talaptardy kúsheitý.
4. Mektepke deiingi mekeme qyzmetkerleriniń kadrlyq áleýetin arttyrý. Kolledjder men JOO-larda mamandardy daiarlaý sapasyn arttyrý.
5. Mektepke deiingi bilim berýdiń jańa modeli boiynsha baǵdarlamalardyń mazmunyn jańartý.
Ministrdiń aitýynsha, sońǵy jyldary balabaqsha tárbieshisi mamandyǵyna oqýǵa túsýge konkýrs kúrt tómendep ketken. Bul eń aldymen jalaqyǵa bailanysty.
"Tárbieshilerdiń jalaqysy jyl saiyn 25%-ǵa óskenimen, bazalyq jalaqynyń azdyǵynan ol áli de bolsa jetkiliksiz bolyp otyr. Qazir biz birneshe balabaqshada pilottyq joba bastadyq. Bul joba boiynsha eki tárbieshi jarty kún emes, kúni boiy jumys istep, eki ese jalaqy alady. Keiin pilottyq joba nátijesi boiynsha sheshim qabyldanady.
Árine, jekemenshik balabaqsha ashatyn kásipkerlerdi qoldaý mańyzdy ekenin túsinemiz. Biraq bizdiń jumysymyzdaǵy basty baǵyt – balalardyń qaýipsizdigi jáne olarǵa qolaily ári sapaly jaǵdai jasaý. Mundai erejeler ata-analar úshin mańyzdy jáne adal kásipkerler úshin paidaly dep esepteimin" - dep túiindedi Aimaǵambetov.
