Foto: QR MAM
2025 jyl Qazaqstan úshin mádeni diplomatiia turǵysynan mazmundy ári nátijeli boldy. Eldiń rýhani áleýetin álemge tanytý baǵytynda birqatar mańyzdy bastamalar júzege asty, dep habarlaidy Ult.kz.
Beijiń qalasynda Qazaqstannyń mádeniet ortalyǵy ashylyp, ol óner, til jáne mádeni almasýǵa arnalǵan iri alańǵa ainaldy. Ortalyqta kórme, bilim berý jáne aǵartýshylyq baǵyttaǵy is-sharalar uiymdastyrylyp, búginge deiin 2000-nan astam adamdy qabyldady. Bul joba Memleket basshysynyń mádeni diplomatiiany kúsheitý jónindegi tapsyrmalaryna tolyq sáikes keledi.
2025 jylǵy aitýly mádeni oqiǵalardyń biri – kórnekti kompozitor Nurǵisa Tilendievtiń 100 jyldyq mereitoiy. Ataýly data IýNESKO-nyń 2024–2025 jyldarǵa arnalǵan halyqaralyq deńgeide atap ótiletin mereitoilar tizimine endi. Uiym kompozitordyń qazaq dástúrli mýzykasyn folklorlyq mura jáne zamanaýi baǵytpen úilestire bilgen kásibi sheberligin joǵary baǵalady.
Abai Qunanbaiulynyń 180 jyldyǵyna orai Rim qalasynda uly aqynnyń eskertkishi ornatyldy. Bul bastama Italiia jurtshylyǵynyń úlken qyzyǵýshylyǵyn týdyryp, Qazaqstan men Eýropa arasyndaǵy mádeni bailanysty nyǵaitty. Sonymen qatar Qyrǵyzstannyń Osh qalasynda Abai atyndaǵy kóshe, eskertkish jáne mýzei ashyldy. Bul sharalar qazaq oishylynyń túrki álemindegi ortaq rýhani mura retindegi ornyn aiqyndai tústi.
Armeniiadaǵy Qazaqstan mádenieti kúnderi aiasynda Erevan qalasynda Abai Qunanbaiuly atyndaǵy saiabaqtyń saltanatty ashylýy ótti. Atalǵan joba Qazaqstan Prezidentiniń Armeniiaǵa resmi sapary barysynda qol jetkizilgen kelisimderdiń nátijesinde júzege asty. Sondai-aq tamyz aiynda Qazaqstan men Qyrǵyzstan prezidentteriniń qatysýymen Muhtar Áýezov pen Shyńǵys Aitmatovqa arnalǵan eskertkish ashylyp, ol eki el arasyndaǵy rýhani jáne ádebi birliktiń simvolyna ainaldy.
Biyl Aqtaý qalasyna Halyqaralyq TÚRKSOI uiymynyń sheshimimen Túrki áleminiń mádeni astanasy mártebesi berildi. Aqtaý jiyrmadan astam eldiń mádeniet ókilderin qabyldap, festivalder, kórmeler, konferentsiialar men shyǵarmashylyq jobalar ótkizdi.
Sonymen qatar 2025 jyly Armeniia men Reseide Qazaqstannyń mádeni kúnderi uiymdastyrylsa, elimizde Vetnam mádenietiniń kúnderi ótti. Mundai sharalar halyqaralyq mádeni bailanysty nyǵaityp, Qazaqstanǵa degen shyǵarmashylyq qyzyǵýshylyqty arttyra tústi.
Qazaqstandyq teatrlar da jyldy tabysty qorytyndylady. «Astana Opera» teatrynyń sheteldik gastrolderi anshlagpen ótip, óner ujymy álemniń jetekshi sahnalarynda joǵary baǵalandy. Teatr solisti Nursultan Ánýarbek álemdik opera ónerindegi eń bedeldi jobalardyń biri sanalatyn Úlken teatrdyń Jastar baǵdarlamasyna konkýrstyq negizde qabyldandy.
