Qazaqstan sportshylary Qytai astanasy Beijińdegi Qysqy Olimpiada oiyndaryna 60- astam litsenziia utyp alǵan. Bul Phionchhandaǵy kórsetkishten joǵary, dep habarlaidy QazAqparat.
Bul týraly QR Mádeniet jáne sport vitse-ministri Serik Jarasbaev ortalyq kommýnikatsiialar qyzmetinde ótken brifingide aitty.
«Iá, endi eki aidan keiin bizdiń sportshylar Qytaidyń Beijiń qalasynda ótetin 2022 jylǵy Qysqy Olimpiada oiyndaryna qatysady. Bizdiń ulttyq qurama tolyq quramda daiyndalyp jatyr. Ázirge sportshylarymyz 8 sport túrinen 60-tan astam litsenziia utyp aldy. Osynyń aldyndaǵy Phionchhan qalasyndaǵy oiyndarmen salystyrsaq, onda 58 litsenziia bolǵan edi. Biatlon, shańǵy jarysy, «fristail mogýl», shańǵy qossaiysy siiaqty sport túrlerinen litsenziialyq jarystardyń aiaqtalýyn kútip otyrmyz. Bul saiystarda da sportshylarymyz litsenziiaǵa talasady», - dedi vitse-ministr.
Onyń aitýynsha, litsenziiaǵa talas 17 qańtarda aiaqtalatynyn eskersek, qazaqstandyq sportshylardyń litsenziia sanyn kóbeitýge tolyq múmkindigi bar.
«Litsenziiany sarapqa salý dedlainy 16-17 qańtarǵa deiin dep belgilengen. Sportshylarymyz Eýropa jáne ózge de elderde ótip jatqan iri halyqaralyq jarystarǵa qatysyp, litsenziiaǵa belsendi talasyp jatyr. Osy maýsymnyń basyndaǵy nátijelerin qarasaq, taǵy da kóbirek litsenziia alamyz degen úmit bar», - dedi Serik Jarasbaev.
