Shanhai yntymaqtastyq uiymyna (ShYU) qatysýshy elderdiń ókilderi Beijińde halyqaralyq Naýryz-2021 merekesin atap ótti, dep habarlaidy "Ult aqparat".
Shanhai yntymaqtastyq uiymynyń bas hatshysy Vladimir Norov quttyqtaý sózinde kóktemgi kún men túnniń teńesetin shaǵy – Naýryz meiramynyń úsh myń jyldan astam toilanyp kele jatqanyn atap ótti. Bul mereke órkendeý men igilikke, beibit ómirge degen úmitti bildiredi.
Onyń aitýynsha, naýryzdyń «jasampaz jáne biriktirýshi rýhy» «ShYU-nyń tabysty damýy úshin birlikti, tutastyqty jáne ómirsheń kúshti», sondai-aq «elderimizde beibitshilik pen igilikti» qamtamasyz etetin «Shanhai rýhyna» sai keledi. Quttyqtaýǵa QHR-da tirkelgen ShYU múshe memleketterdiń elshileri qosyldy.
«ShYU otbasylary» halyqtarynyń ádemi áýenderi men áserli bileri, Naýryz dastarhanyna qoiylǵan dástúrli túrli taǵamdar men aspazdyq taǵamdar kóktem merekesin jandandyryp jiberdi.
Qonaqtar ulttyq pavilondardy aralap, Shanhai yntymaqtastyq uiymyna qatysýshy elderdiń ulttyq qolóner buiymdarymen tanysty.
Esterińizge sala keteiik, 2009 jyly Naýryz IýNESKO-nyń Adamzattyń materialdyq emes mádeni murasynyń reprezentativti tizimine engizilgen bolatyn. 2010 jyly BUU Bas Assambleiasy 21 naýryzdy «Halyqaralyq Naýryz kúni» dep jariialady.
