Kókshetaýlyq oqýshylarǵa WhatsApp arqyly jazyp nemese habarlasyp "Kalmar oiynyna" qatysýǵa shaqyryp jatyr. Osyǵan bailanysty qalalyq bilim bólimi arnaiy beineúndeý jariialady, dep habarlaidy Sputnik Qazaqstan.
Áleýmettik jelide paida bolǵan oiyn ońtústikkoreialyq "Kalmar oiyny" jelisi boiynsha jasalǵan. Serial qarjydan qysylyp, aralǵa oinaýǵa barýǵa kelisken keiipkerler ómirine negizdelgen. Olar tek bir adam ǵana tiri qalǵansha oinaidy. Serial álem boiynsha qyzyǵýshylyqqa ie boldy. Oqýshylar serial stsenariiin qaitalaýǵa áýes.
"Qazirgi ýaqytta mundai fakt Kókshetaýda da baiqalady. WhatsApp arqyly nemese túrli nómirden qońyraý shalyp "Kalmar oiynyna" qatysýǵa shaqyrady", - dedi qalalyq bilim bólimi jetekshisiniń orynbasary Ainur Mýsina.
Ol balalarǵa oiyn men manipýliatsiianyń aiyrmashylyǵyn túsindirýge shaqyrdy.
"Balalarǵa: "Joq, men mundai oiynǵa qatyspaimyn", "Bul qatygez oiyn, maǵan unamaidy" degen sózder úiretińiz", - dedi Mýsina.
Osyndai jaǵdai baiqalsa, 102 telefonyna habarlasýǵa keńes berdi. Bul máseleni qalalyq politsiia basqarmasy baqylaýǵa alǵany aitylyp otyr.
Bul oqiǵaǵa bailanysty eresekter eki topqa bólindi. Biri belgili "Sinii kitke" uqsatsa, endi biri aitarlyqtai qaýip kórip otyrǵan joq. Olai bolsa, "Igra prestolov" serialy, Counter-Strike pen Minecraft oiyndary da qaýipti degendi alǵa tartady.
Politsiia departamenti ázirge túsinikteme bergen joq.
