QR Aqparat jáne qoǵamdyq damý ministrligi tanymal qazaqstandyq telejýrnalist Beisen Quranbek atyndaǵy «Jiger» syilyǵyna ótinimder qabyldaýdyń bastalǵany týraly habarlady.
«Jiger» syilyǵyna ótinimderdi qabyldaý 2021 jyly 20 tamyzdan 20 qyrkúiekke deiin «Media damytý qory» korporativtik qorynyń mdq.kz resmi saitynda júzege asyrylady.
«Jiger» - jýrnalistik sheberlik salasynda áleýmettik mańyzy bar taqyryptardy jariialaǵany úshin beriletin kásibi syilyq.
Syilyqtyń negizgi maqsaty – talantty jýrnalist, qoǵam qairatkeri, Qazaqstan Respýblikasy Prezidenti syilyǵynyń laýreaty Beisen Quranbektiń esimin el jadynda óshirmeý, murasyn saqtap qalý. Beldi jýrnalist qazaqstandyq televiziianyń damýyna úlken úles qosyp, eńbeksúigishtigi men kásibine qaltqysyz qyzmet etýiniń arqasynda áriptesteri men telekórermenderiniń yqylasyna bólendi.
Konkýrsqa qatysý sharttary:
- Konkýrsqa Qazaqstan Respýblikasynyń Respýblikalyq jáne oblystyq telebaǵdarlamalary qatysa alady;
- Konkýrsqa usynylǵan materialdar teleefirde 2021 jyldyń 1 qańtary men 19 qyrkúiek aralyǵynda kórsetilýi tiis;
- Konkýrsqa qazaq jáne orys tilderindegi jumystar qabyldanady;
- Konkýrsqa qoǵam úshin ózekti máselelerdi jáne áleýmettik taqyrypty qozǵaityn telebaǵdarlamalar qatysa alady.
Marapat Beisen Quranbektiń jýrnalistik qyzmettegi printsipterin barynsha tolyq kórsete bilgen jumystarǵa beriledi. Quramyna mediasala mamandary jáne Beisen Quranbektiń úzeńgiles dostary enetin qazylar alqasynyń músheleri daýys berý qorytyndysy boiynsha jeńimpazdardy anyqtaityn bolady.
Baiqaý jeńimpazdary «Jiger» estelik músinshesiniń, diplomnyń jáne qarjylai syilyqtyń iegeri atanady.
I oryn úshin - 1 000 000 teńge, II oryn úshin - 500 000 teńge jáne III oryn úshin - 300 000 teńge.
Baiqaý qorytyndysy men jeńimpazdar esimderi 2021 jyldyń 27 qyrkúieginde belgili bolady.
«Jiger» syilyǵy alǵash ret 2020 jyly QR Aqparat jáne qoǵamdyq damý ministrligimen «Media damytý qory» korporativtik qorymen yntymaqtastyqta quryldy. Syilyqqa otandyq BAQ-tyń 4 ókili ie boldy.
