Sailaý kezinde baiqaýshylar ózderiniń kásibi sheberligin, jaýapkershiligin, biliktiligin kórsetti. Bul týraly brifingte Sailaýdy beipartiialyq baiqaý ortalyǵynyń basshysy Baný Nurǵazieva aitty, dep habarlaidy QazAqparat.
«Sailaýdy beipartiialyq baiqaý ortalyǵy tuńǵysh ret qoǵamdyq institýt retinde qurylyp, sailaý protsesin baqylaýdyń ahýaldyq ortalyǵy retinde qyzmet etti. Bizdiń ortalyq alańynda ártúrli resýrstar: Qazaqstannyń Azamattyq Aliansy, QR Kásipodaqtar Federatsiiasy jáne 130-dan astam úkimettik emes uiymdar biriktirildi. Jalpy, bizdiń baiqaýshylardyń pikiri boiynsha: baiqaýshylarymyz ózderiniń kásibi sheberligin, jaýapkershiligin, biliktiligin kórsetti. Eń bastysy beipartiialyq baiqaýshylar tarapynan eshqandai buzýshylyq bolǵan joq. Olardyń barlyǵy sailaý ýchaskelerine aldyn-ala kelip, óz oryndaryna jaiǵasty. Sailaý protsesine qatysýshynyń árqaisysy óziniń quzyrettiligi men kásibiligin kórsetti», - deidi Baný Nurǵazieva.
Onyń aitýynsha, epidemiologiialyq jaǵdaiǵa qaramastan sailaýǵa qatysýshylar sany kóp boldy.
«Jalpy alǵanda, Beipartiialyq baiqaý ortalyǵy zańmen bekitilgen 11 buzýshylyqty tirkedi. olardyń basym bóligi taza tehnikalyq sipatta bolǵanyn jáne jergilikti jerlerdegi sailaý komissiialarynyń múshelerimen jedel joiylǵanyn atap ótken jón», - deidi ol.
Beipartiialyq baiqaý ortalyǵynyń basshysy keltirgen mysaldarǵa keletin bolsaq, Petropavlda sailaý ýchaskesinen fotosýretter men beinejazbalardy efirge shyǵarǵany úshin baiqaýshylardyń biri sailaý ýchaskesinen shyǵaryldy, sebebi olai etýge zańmen tyiym salynǵan. Mańǵystaý oblysy, Jańaózen qalasynda masań kúidegi azamat daýys ber paraǵyn jáshikke salǵannan keiin jáshikti syndyryp tastaǵan.
«Shymkentte sailaýǵa qatysýshy daýys beretin jáshikti shatastyryp, daýys beretin jáshiktiń qasynda turǵan basqa jáshikke salyp qoiǵan. Aqtóbede saýlaý protsesin videoǵa túsirip, áleýmettik jelige salǵan. Bulai etýge zańmen tyiym salynady. Keibir azamat sailaý ýchaskesine ózderin sailaý komissiiasy múshesi nemese baiqaýshy retinde tanystyryp kirgen. Sóite tura qujattaryn kórsetýden bas tartyp, sailaý ýchaskesine kirip ketkileri kelgen. Oralda bir baiqaýshy sailaý komissiiasyna agressiia kórsetkeni úshin sailaý ýchaskesinen shyǵarylǵan. PTR test nátijesi bolmaǵandyqtan keibir baiqaýshylar sailaý ýchaskesine kirgizilmegen», - deidi Baný Nurǵazieva.
Sondai-aq, ol sailaý protsesine qatysqandarǵa alǵys aitty.
«Sailaý protsesiniń monitoringine qatysqan barlyq beipartiialyq baiqaýshylarǵa daýys berý rásimin baqylaý máselelerindegi joǵary azamattyq jaýapkershiligi men quzyrettiligi úshin shyn júrekten alǵysymdy bildirgim keledi», - deidi ol.
