© Sputnik / Abzal Kaliev
Mańǵystaý oblysynyń Beineý aýylynda oqýshylardyń jappai ýlanýynan keiin júrgizilgen tekseris nátijesi jariialandy, dep habarlaidy Lada.kz.
Oblystyq sanitariialyq-epidemiologiialyq baqylaý departamentiniń basshysy Muhtar Serbaevtyń málimetinshe, orta mekteptegi taǵam blogyna júrgizilgen zertteý barysynda 10 qyzmetkerdiń birinen stafilokokk bakteriiasy tabylǵan. Sondai-aq eki qyzmetker mindetti meditsinalyq tekserýden ótpegen.
"Laboratoriialyq tekserýler daiyn taǵamdardyń 6 úlgisinen ziiandy bakteriialar bar ekenin kórsetti. Tekserý kezinde qoimalardy maqsatsyz paidalaný faktileri tirkelgen. Máselen, kókónisterge arnalǵan qoimada astyq daqyldary saqtalǵan", — dedi Serbaev.
Sondai-aq toǵyz jýyndy úlgisinen ishek taiaqshasynyń bakteriialary tabylǵan.
Mamandardyń aitýynsha, ashanada ýaqytyly ylǵaldy tazalaý júrgizilmegen, qabyrǵalarda jaryqtar bolǵan. Munyń bári sanitarlyq talaptarǵa sai kelmeidi.
"Barlyq materialdar politsiiaǵa joldandy. Qazir sotqa deiingi tergeý amaldaryn bastaý týraly sheshim qabyldanady. Qazir ashana jabyq, balalardyń barlyǵy sabaqta",— dedi Muhtar Serbaev.
Eske salaiyq, 3 sáýir kúni Beineý aýylyndaǵy jalpy bilim beretin mekteptiń oqýshylary ýlaný belgilerimen aýrýhanaǵa túsken edi. Olar –2, 3 jáne 5-synyp oqýshylary.
Osydan keiin mektep ashanasynan synamalar alynyp, tekseris bastalǵan bolatyn.
