Atyraý qalasyndaǵy Talqairan-2 eldi mekeninde ornalasqan oblystyq otbasy úlgisindegi "Shańyraq" balalar aýyly jáne jasóspirimder úiiniń tárbielenýshileri Sputnik Qazaqstan tilshisine shaǵymyn aitty.
Atyraýdaǵy balalar úiinen shý shyqty. Osy mekemeden túlep ushqan tárbielenýshilerdiń aitýynsha, atalǵan mekemede balalarǵa álimjettik jasalady, balalardyń ar-namysyna tiedi.
"Bul mekemede balalarǵa rasymen kúsh qoldanylady. Men bul balalar úiinde bolǵan ýaqytymnyń bárinde úlken balalar kishilerdi uratynyn óz kózimmen kórdim. Tárbieshiler ar-namysymyzǵa tietin sózder aitatyn, bizdiń ata-analarymyz týraly aýyr sózder aitady. Ár apta saiyn juma kúni lineika ótedi. Sol jerde kináli bolǵan balany ortaǵa shyǵaryp, shara qoldanady. Mysaly, "otjimanie" jasatady, otyryp turǵyzady. Direktor osynyń bárin kórip turyp, túk bilmegendei júretin", - deidi Sputnik Qazaqstan tilshisine jasyryn suhbat bergen Ilia Temirhanov (aty-jóni ózgertilgen).
Onyń aitýynsha, tárbieshiler ózderi urmaidy, kishilerdi úlkenderge urǵyzady.
"Jaqynda ǵana Angelina esimdi qyz baspaldaqtan qulap ketti dedi. Oǵan esh dálel joq. Baspaldaqtan qulady dep aitqyzyp qoidy. Balalar úiinde mundai jaǵdailar óte jii bolady", - deidi ol.
Jaqynda osy mekemeniń tárbielenýshisi Nurdáýlet Shýdabaev "150" senim telefonyna habarlasyp, zábir kóretinin aityp shaǵymdanǵan. Jasóspirim bul mekemede turyp jatqanyna 7 jyl bolǵan. Balanyń shaǵymynan soń 9 qańtarda tiisti organnan arnaiy tekserý kelgen. Shýdabaevtyń aitqanynyń bári ras, deidi mekemeniń taǵy bir tárbielenýshisi Oljas Yrymbaev (aty-jóni ózgertilgen).
"Nurdáýlet Shýdabaevtyń aitqanynyń bári ras. Men "Shańyraq " balalar úiinde tárbieshiler tarapynan kóptegen qatygezdik kórdim. Bul mekemede tárbieshiler kishilerdiń sabaǵy nashar nemese basqa jaǵdai bolǵan jaǵdaida 15, 16, 17 jastaǵy eresekterden jaýap alady. Al bul eresekterge esh baqylaý joq. Kishilerdi uryp jatyr ma, soǵyp jatyr ma, qalai tárbieleidi óz erkine jibergen", - deidi Oljas Yrymbaev.
Ár apta saiyn mekemede ótetin lineikada balalardyń ar-namysyn qorlaityn sózder aitylatyn kórinedi.
"Lineikada bizdiń namysymyzǵa tietin sózder aitady, ata-analarymyzdy jamandaidy. Tárbieshiler balalardy jamandaidy, al direktor sol jerde shara qoldanady. "Otjimanie" jasatady, planka otyrǵyzady nemese bir-birine qarsy qoiady. Eki kishkentai balany ortaǵa alyp shyǵady. Ekeýin bir-birimen tóbelestiredi. Bunyń barlyǵy úlkender kúlý úshin jasalady", - deidi Oljas Yrymbaev.
Oljas Yrymbaevtyń aitýynsha, balalar úiiniń bylyǵy bir bul emes.
"Men de kishkentailardy tárbielegen "jaýaptynyń" biri boldym. Tárbieshiler soq dese soǵamyz, aiqaila dese aiqailaimyn. Bolǵan basqa oqiǵalar týraly aitýǵa aýzym barmaidy. Sol istegen isime shyn júregimmen qatty ókinemin. Árine Gúlsara Amanǵaliqyzy men tárbielenýshiler bárin joqqa shyǵarady. Óitkeni balalardy solai úiretip qoiǵan", - deidi tárbielenýshi.
Mekemedegiler jumystan shyǵyp qalǵan maman balalarǵa aqsha berip, burynǵy jumys ornyn jamandatqyzyp otyr dep esepteidi. Al Oljas Yrymbaev buny joqqa shyǵarady.
"Túk te olai emes. Meniń sózimdi de olar joqqa shyǵarady. Shyn máninde eshbir maman bizge aqsha salyp, balalar úiin jamandatqan emes. Tárbieshiler balalardy beinekamera joq jerge aparyp urady. Meniń armanym balalar úiinde turatyn barlyq balada baqytty balalyq bolsa deimin. "Shańyraq" degen balalar úiinde qandai bylyq bolyp jatqanyn bári bilse deimin", - deidi Oljas Yrymbaev.
Balalardyń aiǵaǵyn eks-tárbieshi Máriiash Dosalieva da rastaidy.
"Men byltyr jeltoqsannan bastap jumysqa kirdim. Aqpanda jumystan shyǵaryp jiberdi. Óitkeni "150"-ge habarlasqan balany siz úgittedińiz dep jala japty. Komissiia menen bala qandai dep surady. Men qalai jamandaimyn, bala ártúrli sharalarǵa qatysady, alǵyr bala. Sabaqtan qalǵanyn da kórgen emespin. Nurdáýletti 2022 jyly jazda urǵan eken, men ol kezde jumys istegem joq. Balanyń basyn mekemeniń basshylyǵy ájethanaǵa batyrypty. Ony maǵan Nurdáýlettiń ózi aityp berdi. Sol ýnitazǵa basyn batyrǵan kezde direktordyń qasynda Saliha, Qadisha jáne Áliia degen kisiler bolypty", - deidi eks-tárbieshi Máriiash Dosalieva.
Mekemede tárbieshi bolyp istegen Máriiash Dosalieva bul jerde balalarǵa únemi qysym kórsetiletinin aitady.
"Direktor Asyljan degen balany balalardy qadaǵalaityn etip taǵaiyndap qoiǵan. Ol balaǵa direktor kiim, uialy telefon áperip qoidy. Asyljan basqa balalarǵa álimjettik jasap, ábden mezi etti. 25 qańtarda bilim basqarmasynan komissiia keldi. Komissiiaǵa Aslanbek Dáýletovtyń jaǵdaiyn kórip ketińizdershi dep ótindim. Aslanbekti sol Asyljan uryp, ol 4 kún sabaqtan qaldy. Direktorǵa arqa súiep alǵan Asyljan tárbieshini de kózge ilmeidi. Men bul máseleni komissiiaǵa aityp túsindire almadym. Olar maǵan "bul mekemeniń ishtegi jaǵdaiy, Botataeva ózi sheshedi" dep ketip qaldy", - deidi Máriiash Dosalieva.
Tárbieshiniń aitýynsha, mekemege tekserý kelse, "bári keremet, jaǵdaiymyz jaqsy" dep aitatyn on shaqty balany arnaiy daiyndap qoiǵan, al zábir kórip júrgen balalardy ondai jerge jolatpaidy. Al taǵy bir eks-tárbieshi Sholpan Bazarqyzynyń ýáji mynadai.
"Direktor Nurdáýlet Shýdabaevty alyp ketti de, sol kisiden qoly kógerip keldi. Men ony fotoǵa túsirip aldym. Ol balada psariaz boldy. Dermatolog mamanǵa únemi qaralyp turatyn. Priemǵa barǵanda denesiniń kógergenin kórgen dárigerler suraqtyń astyna alatynyn bilemin. Men sol ózimniń basym ketip qalmasyn dep, aiǵaq retinde fotony túsirip aldym. Óitkeni balanyń denesindegi kógergendi menen kórýi múmkin ǵoi. Fotodaǵy bala Nurdáýlet Shýdabaev. Ol tárbielenýshi mende 2019 jyldan beri júr. Árine janym ashidy, júregim aýyrady. Óitkeni birge turyp, birge tamaq iship, birge uiyqtap júrgen balalarym ǵoi. Biraq direktorǵa qalai "sizdiki durys emes, nege bulai isteisiz dep aitamyn". Direktor olardyń zańdy túrde qamqorshysy", - deidi balalar úiiniń eks-tárbieshisi Sholpan Bazarqyzy.
Al aty-jónin kórsetpeýdi ótingen úshinshi tárbieshi bylai deidi.
"Angelina degen qyzdyń beti kógerip júrgenin bári kórdi. Bes jasar qyzdy beldikpen urǵany ras. Sol kezde qyzdyń betin kórdim. Ol jerde durys psiholog ta joq. Balalar birnárse búldirse, birden direktorǵa aparý kerek. Oǵan aparaiyn desem janymyz ashidy", - deidi atyn jasyrǵan tárbieshi.
Balalar úiiniń direktory Gúlsara Botataeva bul aiǵaqtyń bárin joqqa shyǵardy.
"Shyndyqqa janaspaityn nárse kóp. Eshnárse dáleldengen joq. Senim telefonyna habarlasqan Nurdáýlet Shýdabaevqa tárbieshi Máriiash Dosalieva 60 myń teńge aqsha berem dep, óziniń bas paidasyna balany paidalanǵan. Úsh balany úgittegen. Bireýi - Asyljan, ekinshisi - Elenora degen qyz. Asyljan "qoraǵa kirip" ketkendikten Máriiashtyń aitqanyn oryndaǵan. Sosyn zeinetke ketken taǵy bir tárbieshi bar, sol Nurdáýletti syiǵyzbady", - deidi Gúlsara Botataeva.
Mekeme direktorynyń aitýynsha aqqa qara jaǵyp otyrǵan eks-tárbieshiler.
"Balanyń basyn ýnitazǵa tyqty degen, onyń aldynda seksýaldy jaǵdai boldy degen jalanyń barlyǵy da dáleldenbegen. Men bul kisilerdiń ústinen shaǵym jazamyn", - deidi "Shańyraq" otbasylyq úlgidegi balalar úiiniń direktory Gúlsara Botataeva.
Al oblystyq bilim basqarmasynyń basshysy Gúlnár Sádýaqasova tergeý júrip jatqandyqtan qandai da bir suhbat bere almaitynyn aitty.
Aita keteri, bilim basqarmasy qurǵan komissiia buǵan deiin balalar úiinde tekserý júrgizgen. Biraq, tárbieshiniń aitýynsha, sol kezde kókala qoidai taiaq jep, sabaqqa bara almai jatqan Aslanbek Dáýletovty kórýge komissiianyń qulqy bolmaǵan.
Atyraý oblystyq politsiia departamenti bul faktiler boiynsha tergeý júrgizip jatyr.
"Qazirgi tańda áleýmettik jelide taralǵan balalar úiindegi derekterge qatysty Qylmystyq kodekstiń 140-baby 1-bóligi boiynsha sotqa deiingi tergeý amaldary júrgizilip jatyr. Ózge aqparat QR QPK-niń 201-babyna sáikes jariialanbaidy", - dep málimdedi oblystyq PD baspasóz qyzmeti.
