Ánshi Dimash Qudaibergen álemdik deńgeidegi qandai ánshilermen jumys jasap jatqany jáne aldaǵy jospary týraly aityp berdi, dep habarlaidy QazAqparat tilshisi.
«Árine, ánshi úshin jaqsy kompozitorlarmen jumys jasaý óte mańyzdy bolyp tabylady. Osy oraida, meniń mansabymda, shyǵarmashylyq ómirimde jaqsy kompozitorlar kezdesip jatyr dep aitýǵa tolyq negiz bar. Qazirgi ýaqytta biz Igor Krýtoimen jaqsy mýzykalyq tandem bolyp júrmiz. Ol kisiniń kásibi turǵydaǵy biliktiligi, mýzykadaǵy bilimi týraly uzaq áńgime aitýǵa bolady. Óitkeni, ol Pavarotti, Lara Fabian, Dmitrii Hvorostovskii sekildi álemdik kompozitorlarmen jumys jasaǵan bilikti óner iesi. Qazirgi tańda Krýtoidyń shyǵarǵan birneshe týyndylary meniń repertýaryma enip otyr», - dedi Dimash Qudaibergen OKQ-da ótken baspasóz máslihatynda.
Ánshi óz sózinde sol sekildi «Titanik» áni boiynsha jumys jasaǵan, Gremmi syilyǵynyń eki márte iegeri Ýolter Afanaseff esimdi tamasha kompozitormen shyǵarmashylyq qarym-qatynasta ekenin atap ótti.
«Biraq halyqqa ábden tolyqqandy pisken daiyn shyǵarmany usynǵymyz keledi. Sol sebepten men ózime nemuraily qarai almaityn mýzykanttar qatarynan bolǵandyqtan, árbir ándi shyǵarmas buryn júz oilanyp, myń tolǵanamyn. Al meniń sahnaǵa alyp shyǵyp, oryndap júrgen ánderim tek kompozitorlardyń emes, meniń de júregimnen ótken ánder. Al ol ánderdi birden keziktirý óte qiynǵa soǵady», - dedi ánshi.
Dimash jaqynda eń alǵashqy albomy jaryq kóretinin aityp ótti.
«Qazaq yrymshyl halyqpyz ǵoi. Aldaǵy maqsattardy jaiyp salǵandy jón kórmeimiz. Degenmen aityp óteiin, Igor aǵamyz ekeýmiz aityp júrgen «Qaljyraǵan aqqýlardyń sezimi» degen ánge beinebaian túsirgeli jatyrmyz. Odan keiin Amerikadaǵy kompozitorlardan kelgen tamasha ánderge beinebaian túsirgeli otyrmyz», - dedi Dimash.
Eske sala ketsek, buǵan deiin OKQ-da ótken baspasóz máslihatynda Dimash Qudaibergen Jastar jyly aiasynda Astanada kontsert beretinin habarlaǵan bolatynbyz.
