Belarýs Respýblikasynyń Qazaqstandaǵy elshisi Anatolii Nichkasov QR Beibit jiyndardy uiymdastyrý men ótkizý tártibi týraly zań jobasyna qatysty pikir bildirdi, dep habarlaidy QazAqparat.
«Zań jobasymen tanysýǵa jaǵdai jasaǵany úshin QR Syrtqy ister ministrligine alǵys aitamyn. Bul - Prezident Qasym-Jomart Toqaevtyń tapsyrmasymen «Halyq únine qulaq asatyn memleket» tujyrymy aiasynda ázirlengen alǵashqy zańdardyń biri. Zań jobasyn ázirleýge saraptamalyq jáne jumys toptary, Májilis, úkimettik emes uiymdar úles qosty. Shynynda da memleket qoǵam usynǵan bastamalardy eskerdi. Zań jobasy 1995 jylǵy jiyndar men mitingiler týraly zań qaǵidalaryn damytady», - dedi diplomat QR Syrtqy ister ministrliginde ótken kezdesýde.
Onyń aitýynsha, Qazaqstan azamattyq quqyq pen bostandyqty qorǵaý boiynsha barlyq halyqaralyq qujattar men mindettemelerge belsendi qatysady.
«Zań jobasynyń alǵashqy redaktsiiasy muqiiat qaraldy jáne Májilistegi qaralymda eskertýler aitylyp, eleýli ózgerister engizildi. Rasynda da qoǵam jiyndar men mitingiler, sherýler ótkizýge tolyq quqyly. Ásirese, BAQ qyzmetiniń qatysýyna bailanysty máselege erekshe mán berilgen. Birqatar eskertý memlekettik basqarý organdary men kúshtik qurylymdardyń qatysýymen bailanysty boldy. Senattaǵy qaralymda eleýli ózgerister qabyldanady dep senemin. Qazaqstandaǵy barlyq saiasi oqiǵalardan habardar bolyp otyramyz. Óte jaqsy pikirler aitylyp jatyr. Diplomattardyń basym bóligi zańger bolǵandyqtan, óz pikirimizdi bildirýimiz qajet dep esepteimin. Bul - qazaqstandyq zań bolýy kerek jáne onda ulttyq erekshelikter eskerilýi tiis», - dedi A. Nichkasov.
