Senatta depýtat Vladimir Volkovtyń tóraǵalyq etýimen Konstitýtsiialyq zańnama, sot júiesi jáne quqyq qorǵaý organdary komitetiniń keńeitilgen otyrysy ótti, dep habarlaidy QazAqparat.
Onda «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jáne «Qazaqstan Respýblikasynyń keibir zańnamalyq aktilerine Qazaqstan Respýblikasynda beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrý engizý týraly» zań jobalary qaraldy.
«Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasynda piketteý, jinalys, miting, demonstratsiia, sherý siiaqty kópshilik pikirin bildirýdi qamtityn beibit jinalystar túrleri kórinis tapqan jáne olardyń negizgi printsipteri qarastyrylady, beibit jinalystar ótkizýge bolatyn arnaiy oryndardy uiymdastyrýdy qamtamasyz etýge qoiylatyn talaptar aiqyndaldy.
Sondai-aq memlekettiń qorǵanys qabiletin, qaýipsizdigin jáne halyqtyń tynys-tirshiligin qamtamasyz etetin uiymdardy, onyń ishinde strategiialyq jáne áskeri obektilerdi, sondai-aq QR Prezidentiniń, QR Tuńǵysh Prezidenti – Elbasynyń rezidentsiialaryna irgeles aýmaqtardy qospaǵanda, kez kelgen jerlerde, onyń ishinde ortalyq memlekettik organdardyń, jergilikti atqarýshy organdardyń ǵimarattary mańynda jeke piketter ótkizý múmkindigi engizilgen.
Qujatta beibit jinalystardy uiymdastyrýshylardyń, qatysýshylardyń mártebesi, quqyqtary men mindetteri bekitiledi, memlekettik organdardyń beibit jinalystar uiymdastyrýshylaryna kómek kórsetý jónindegi mindetteri kózdeledi, jergilikti atqarýshy organdarǵa beibit jinalystar ótkizýden bas tartý úshin negizderdiń tolyq tizbesi belgilenedi. Odan basqa, beibit jinalystar ótkizý kezinde úgit institýty engiziledi, ony uiymdastyrýshylar buqaralyq aqparat quraldary, áleýmettik jeliler, mesendjerler arqyly ótkize alady.
Zań jobasyn qabyldaý beibit jinalystardy ótkizý salasyndaǵy qoǵamdyq qatynastardy tiimdi retteýge, azamattardyń beibit jáne qarýsyz jinalýǵa konstitýtsiialyq quqyǵyn iske asyrýdyń quqyqtyq negizderin qamtamasyz etýge, jinalystar, mitingiler men demonstratsiialar, sherýler men piketter ótkizýge, sondai-aq azamattyq qoǵam institýttaryn jáne jeke tulǵa men memleket arasyndaǵy ózara qarym-qatynas tetikteriniń tiimdiligin damytýǵa múmkindik beredi.
Komitettiń keńeitilgen otyrysynda depýtattar «Qazaqstan Respýblikasynyń keibir zańnamalyq aktilerine Qazaqstan Respýblikasynda beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrý engizý týraly» zań jobasyn da qarady.
«Bul zań jobasynda «beibit jinalys» uǵymynyń engizilýine bailanysty 3 kodeks pen 8 zańǵa ózgerister men tolyqtyrýlar engizý kózdelgen. Sonymen qatar uiymdastyrýshylardyń, qatysýshylardyń ákimshilik zańnamany buzǵany úshin, sondai-aq sanktsiia berilmegen mitingilerdi uiymdastyrǵany jáne qatysqany úshin ákimshilik jaýapkershiligin kúsheitý usynylady.
Qujatta sonymen qatar «Buqaralyq aqparat quraldary týraly» zańǵa túzetýler de bar, oǵan sáikes buqaralyq aqparat quraldary salasyndaǵy ýákiletti organ beibit jinalystarǵa qatysatyn jýrnalistiń (buqaralyq aqparat quraldary ókiliniń) qyzmet erejelerin, jýrnalistiń aiyrym belgileriniń nysandaryn bekitedi.
Zań jobasy qoǵamdyq qatynastardy retteidi jáne azamattyq qoǵam institýttaryn, azamattar men memleket arasyndaǵy ózara qarym-qatynastardyń jańa tetikterin damytady, azamattardyń beibit jinalystar ótkizý quqyǵyn iske asyrýǵa bailanysty qoǵamdyq-saiasi turaqtylyqty ornyqtyratyn bolady», - dedi palatanyń baspasóz qyzmetinen.
Qujattar palatanyń qaraýyna berildi.
