Qazaqstannyń beibit jinalystar týraly jańa zań jobasyn modernizatsiialyq kúntártibi negizinde qarastyrǵan jón. Mundai pikirdi QR Prezidenti janyndaǵy Qazaqstan strategiialyq zertteýler institýtynyń aǵa ǵylymi qyzmetkeri Sliamjar Ahmetjarov bildirdi, dep habarlaidy QazAqparat.
«Qazaqstannyń beibit jinalystar týraly jańa zań jobasyn modernizatsiialyq kúntártibi negizinde qarastyrǵan jón. Saiasi ekonomika salasyndaǵy bedeldi ǵalymdardyń biri F.Fýkýiama modernizatsiia teoriiasynyń úsh negizgi qurylymyn kórsetedi – bul ekonomikalyq ósý, áleýmettik jumyldyrý jáne saiasi damý. Osy elementterdiń árqaisysy qoǵamnyń «dástúrli» kúiden «zamanaýi» modelge ózgerýi men aýysýynda negizgi ról atqarady«, - dedi sarapshy.
Onyń atap ótýinshe, Qazaqstan kóp jaǵdaida Ońtústik Aziia elderiniń jańǵyrý jolymen júrip keledi. Japoniia, Ońtústik Koreia jáne Taivandaǵy XX ǵasyrdyń ekinshi jartysynda oryn alǵan qarqyndy ekonomikalyq ósim azamattyq qozǵalystardyń ósýine jáne soǵan bailanysty saiasi ózgeristerge sebep boldy. Osyǵan uqsas stsenarii Qazaqstanda baiqalady. Iaǵni táýelsizdik kezeńinde indýstriialyq damý baǵdarlamalary arqyly memleket turaqty ekonomikalyq ósýdi qamtamasyz etti. Qazaqstandyqtardyń ál-aýqatyn jaqsartý azamattardyń Úkimetpen suhbattasýǵa jáne memlekettik sheshimder qabyldaý úderisine qatysýǵa degen suranysynyń artýyna ákeldi.
«Osy turǵyda Qazaqstandaǵy beibit jinalystar týraly jańa zań jobasy Memleket basshysynyń tapsyrmasy boiynsha ázirlengen saiasi reformalar toptamasyna kiredi. Osylaisha, Qazaqstan qoǵamdy jańǵyrtýdyń sońǵy satysynda tur. Beibit jinalystar týraly zań jobasy azamattardyń áleýmettik jumyldyrý jáne túrli qoǵamdyq-saiasi máseleler boiynsha óz pikirlerin bildirý múmkindikterin keńeitýge arnalǵan. Sonymen qatar, beibit jinalystarǵa ruqsat alýdyń habarlandyrý sipatyna ótýi – bul qazaqstandyq saiasi júieni yryqtandyrýǵa baǵyttalǵan progressivti qadam», - dedi ol.
Sarapshy beibit jinalystar týraly zańnyń qabyldanýy túptep kelgende qazaqstandyq qoǵamda mitingiler, piketter jáne demonstratsiialar mádenietin qalyptastyratyndyǵyn aitady.
«Óz kezeginde, azamattardyń «keri bailanysy» memlekettik saiasat salasyndaǵy oilastyrylǵan sheshimderdiń qabyldanýyna yqpal etedi. Beibit jinalystar týraly zańǵa túzetýler keń aýqymdy kózqaras turǵysynan alǵanda qazaqstandyqtardyń azamattyq bolmysyn nyǵaitýǵa jáne qoǵamnyń memlekettik bilik júiesine áserin kúsheitýge múmkindik beredi», - dedi Sliamjar Ahmetjarov.
