Búgin QR Parlamenti Senaty «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Qazaqstan Respýblikasy Zańy jobasyna engizgen túzetýler Májiliske jiberildi, dep habarlaidy QazAqparat.
«Sizderge Zań jobasyn ekinshi oqylymǵa daiyndaý kezinde ony jetildirýge bailanysty týyndaǵan máselelermen tanystyrýǵa ruqsat etińizder. Bas komitet Senattyń zańnama, redaktsiialyq-baspa bólimderimen birlese otyryp Zań jobasynyń jekelegen baptaryna ózgerister men tolyqtyrýlar engizý qajet degen toqtamǵa keldi. Komitet Zań jobasyndaǵy alty bapqa bailanysty on alty usynysty oryndy dep sanap, olardy salystyrmaly kestege engizip, Sizderdiń nazarlaryńyzǵa usynyp otyr», - dedi Senattyń jalpy otyrysynda zań jobasy boiynsha baiandama jasaǵan senator Sársenbai Eńsegenov.
Onyń atap ótýinshe, usynystardyń bir toby Zań jobasynyń 5-baby 2-shi tarmaǵyndaǵy beibit jinalysty uiymdastyrýshynyń mindetteri men osy baptyń 3-shi tarmaǵyndaǵy beibit jinalystar ótkizý kezinde tyiym salý negizderin qamtityn, sonymen birge 6-baptyń 3-shi tarmaǵyndaǵy beibit jinalysqa qatysýshynyń áreketine tyiym salý týraly tarmaqtarǵa qatysty.
«Zań jobasynda uiymdastyrýshyǵa beibit jinalystar ótkizý kezinde beibit jinalysqa qatysýshylardan óz betin búrkemeýdi, onyń ishinde bet álpetin tanýǵa kedergi keltiretin kiim-keshekti jáne ózge de zattardy paidalanbaýdy talap etýge mindet qylyp júktegen. Sol siiaqty, beibit jinalysty ótkizý kezinde uiymdastyrýshyǵa bet álpetin tanýǵa kedergi keltiretin kiim-keshekti jáne ózge de zattardy paidalanýǵa tyiym salynǵan. Komitet uiymdastyrýshyǵa mindettelip otyrǵan bul normalardy alyp tastaýdy usynady. Sebebi kei jaǵdaida beibit jinalysqa qatysýshylardyń densaýlyǵyn saqtaýǵa bailanysty jeke qorǵanysh quraldaryn paidalaný qajettiligi týyndaýy múmkin. Osyndai negizben Zań jobasyndaǵy beibit jinalysqa qatysýshynyń densaýlyǵyn saqtaýǵa baǵyttalǵan jeke qorǵanysh quraldaryn paidalanýǵa múmkindik beretin tolyqtyrý usynylyp otyr», - dedi senator.
