QR Indýstriia jáne infraqurylymdyq damý ministri Beibit Atamqulov turǵyn úi baǵasy tóńireginde qalyptasqan jaǵdaiǵa túsinik berdi, dep habarlaidy QazAqparat.
«Habar» telearnasyndaǵy «Ult múddesi» baǵdarlamasynda ministr memlekettiń turǵyn úi naryǵyna áleýmettik az qamtylǵan toptardy qoldaý arqyly yqpal etip otyrǵanyn atady.
«Pandemiiadan keiingi kezeńde bizde turǵyn úige degen suranys óte joǵary boldy. Onyń birneshe sebebi bar. Birinshi kezekte, bul - keiinge qaldyrylǵan suranystyń áseri. Aitpaqshy, memleket 2020 jyly - pandemiianyń sharyqtaý kezeńinde qurylys infraqurylymyna óte úlken qoldaý jasady. 2020 jyly 15 mln sharshy metr turǵyn úi qoldanysqa berildi. Biyl 17 mln sharshy metr turǵyn úi berý josparlanǵan», - dedi Beibit Atamqulov.
Ministr elde turǵyn úi baǵasy kóterilgenin moiyndady.
«Keiinge qaldyrylǵan suranys týraly aittym ǵoi. Adamdar tipti dúkenge bara almai qalǵan qiyn kezeń boldy. Qarym-qatynas pen alys-beristiń kez kelgen túri shektelgen shaǵy esińizde shyǵar. Bul ýaqytta adamdar bankke bara almady. Álem boiynsha qurylys materialdarynyń barlyq túri, ásirese metaldyń qymbattaýy naryqtaǵy baǵaǵa keri áser etti. Bir jaǵynan baspanaǵa suranys bar. Biraq qurylys materialy men shikizatynyń baǵasy aspandap ketti. Bul qurylystyń qarqynyn baiaýlatty. Turǵyn úi baǵasy osylai kóterilip shyǵa keldi», - dep túsindirdi vedomstvo basshysy.
Beibit Atamqulovtyń aitýynsha, pandemiiaǵa deiingi kezeńde Qazaqstan óndiriske qajet bolattyń eleýli bóligin syrttan ákelip otyrdy. Bul jait endi baspana baǵasyn aiqyndaýda salmaqty ról atqaryp otyr.
«Biz qurylys materialdarynyń naryǵyna túgeldei taldaý jasadyq. Qazaqstanda qurylys materialdaryn júz paiyz derlik ózimizde óndirýge bolady. Tehnologiialyq tizbekten bastap naryqqa deiingi jasalǵan taldaý qorytyndysy suranysty alypsatarlar ýshyqtyrǵanyn kórsetti. Tasymaldaý baǵasy ósken. Básekelestikti qorǵaý agenttigi iske kirisip edi, baǵalar túse bastady. Naryqtaǵy suranys, ajiotaj, beton óndirisi, tsement baǵasy – munyń bári baǵaǵa áser ete berdi» - dep túsindirdi ministr.
Aitýynsha, iri qalalarda kirpish baǵasy da ósken.
«Kirpish baǵasyna qatysty tańǵalarlyq jaǵdai qalyptasyp otyr. Otandyq ónim bolsa da, úsh iri qalada onyń baǵasy qatty ósti. Ásirese astanamyz ben Almaty qalasynda qymbattap shyǵa keldi. Al ózge óńirlerde ondai baǵa aýytqýy bolǵan joq. Búginde beton men tsementke degen qajettilikti júz paiyz, armatýra boiynsha 65% ótep otyrmyz. Qurylys materialdarynyń naryǵyn jergiliktendirý baǵytynda 35 jańa joba josparlanǵan», - dedi ministr.
Ministrdiń paiymynsha, turǵyn úige degen suranysty birjolǵy zeinetaqy tólemin alýǵa berilgen ruqsat ta ýshyqtyrǵan.
«Bul negizi durys sheshim boldy. Sonyń arqasynda azamattarymyzdyń kóbi jaǵdailaryn jaqsarta aldy, birazy nesielerin japty» - dedi Beibit Atamqulov.
