QR Indýstriia jáne infraqurylymdyq damý ministri Beibit Atamqulov beinekonferentsiia formatynda ótken qoǵamdyq keńes otyrysynda ministrlik jetekshilik etetin baǵyttar boiynsha biylǵy mindetterdiń iske asyrylý barysyn baiandady, dep habarlaidy "Ult aqparat".
Biyl ministrlik 2025 jylǵa deiingi Indýstriialandyrý baǵdarlamasyn iske asyrýǵa kiristi. Negizgi maqsat – óńdeý ónerkásibin damytý. Pandemiiaǵa qatysty daǵdarysqa qaramastan 2020 jyldyń 8 aiynda elimizde óńdeý ónerkásibi 3,3 paiyz artty. Tústi metallýrgiia +2,7, farmatsevtika +34,1, jeńil ónerkásip +11, mashina jasaý +16,3, himiia ónerkásibi +3,1 paiyz ósti.
Indýstriialandyrý baǵdarlamasy aiasynda jyl basynan beri 187,3 mlrd teńge kóleminde memlekettik qoldaý kórsetildi. Baǵdarlamanyń jańa bastamalaryn iske asyrý maqsatynda birqatar zańnamalyq bastamalar toptamasy ázirlendi. Úkimettiń Qaýlysymen «QDB-Lizing» AQ bazasynda Ónerkásiptik damý qory qurylyp, qarjylandyrý quraldary keńeitildi.
Búgingi tańda «Ónerkásiptik saiasat týraly» Zańnyń tujyrymdamasynyń jobasy ázirlendi. Tujyrymdama qazirgi ýaqytta jumys tobynyń qaraýynda jatyr. Jyl sońyna deiin Tujyrymdama bekitilip, Zań jobasy ázirlenedi dep josparlanyp otyr.
Memleket úshin kúrdeli kezeńde ministrlik az ǵana ýaqyt ishinde halyqty qajetti meditsinalyq buiymdarmen jáne dári-dármekpen qamtamasyz etý úshin jumysty qaita baǵdarlai aldy.
Nátijesinde búgingi tańda naryqtyń kún saiynǵy suranysy táýligine 900 myń dana betperde bolsa, farmatsevtikalyq kásiporyndardyń júktemesi 75 paiyz shamasynda. Epidemiologiialyq ahýal ýshyqqan jaǵdaida óndiristi táýligine 1,5 mln danaǵa deiin jetkizetin qýattylyq rezervi qarastyrylǵan.
Atalǵan ministrlik baspasóz qyzmetiniń málimetinshe, jer qoinaýyn paidalaný salasynda 2017 jyly batys avstraliialyq úlgi negizinde «Jer qoinaýy jáne jer qoinaýyn paidalaný týraly» QR jańa kodeksi qabyldandy. Búgingi tańda jer qoinaýyn paidalaný quqyǵyn berý úshin jalpy aýdany 733 myń sharshy shaqyrymdy quraityn 300 myńnan astam blok qoiylyp, barlaý jumystaryna 780-nen astam litsenziia berildi.
Atalǵan bastama mineraldyq shikizat bazasymen tolyqtyrý úshin Qazaqstan aýmaǵyn qamtýǵa múmkindik berip, kelisim-sharttar sany 2019 jylǵy 68-den 575-ke deiin jetedi.
«Nurly jol» infraqurylymdyq damý memlekettik baǵdarlamasy aiasynda aldaǵy 6 jylda 11 myń shaqyrym avtojol salý jáne qaita jańǵyrtý, sondai-aq respýblikalyq joldardyń 11 myń shaqyrymyn kúrdeli jáne ortasha jóndeý josparlanyp otyr. Oǵan qosa, jaqsy jáne qanaǵattanarlyq jaǵdaidaǵy respýblikalyq mańyzy bar joldar úlesin 100, I jáne II tehnikalyq sanattaǵy joldardy 60 paiyzǵa deiin jetkizý, jol boiyndaǵy servis obektilerimen 100 paiyz qamtamasyz etý mindeti tur.
Temirjol tranzitin 49 paiyzǵa 18 mln-nan 26,9 mln tonnaǵa deiin arttyrý josparlanyp otyr. Konteinerlik tranzitti 2025 jylǵa deiin 2 esege ulǵaityp, 2025 jyly 1,6 mln konteinerge jetkizý kózdelgen. Jolaýshylar tasymaly jylyna 8,1 mln-nan 11 mln-ǵa artyp, 35 paiyzǵa ósedi.
Josparlanǵan jobalardyń barlyǵyn iske asyrý 550 myń jumys ornyn ashýǵa múmkindik beredi. Nátijesinde kólik salasynda eńbek ónimdiligi 20 paiyzǵa, investitsiialar mólsheri 3 esege ulǵaiady.
Ministrlik temir jol kóligimen júk tasymaldaý naryǵynda shynaiy básekelestik ornatýdy esepke ala otyryp zańnamany ári qarai jetildirý jumystaryn júrgizýde. Memleket basshysy óz Joldaýynda irgeli infraqurylymdyq jobalar, qyzmet sapasyn jáne tranzittik baǵyttardyń jyldamdyǵyn arttyrý esebinen Qazaqstannyń básekege qabilettiligin arttyrýǵa erekshe nazar aýdardy.
Atalǵan baǵytta ministrlik 2020-2025 jyldarǵa arnalǵan «Nurly jol» baǵdarlamasy aiasynda osal tustaryn joiý úshin birqatar irgeli infraqurylymdyq jobany iske asyrýdy josparlap otyr. Atap aitqanda 2021 jyldan bastap Dostyq-Aqtoǵai-Moiynty (840 shaqyrym) ýchaskesin jańǵyrtý jónindegi stragegiialyq jobany iske asyrý ýchaskeniń ótkizý qabiletin 2 esege arttyryp, júk tasymaldaý merzimin 1,5 esege qysqartady.
Ýchaskeni jańǵyrtý kezinde 2 myńnan astam jańa jumys orny ashylyp, Almaty, Qaraǵandy jáne Shyǵys Qazaqstan oblystary turǵyndaryn jumyspen qamtamasyz etedi. Buǵan qose, memlekettik-jekemenshik seriktestik negizinde uzyndyǵy 73 shaqyrymdyq Almaty stansasyn ainalyp ótetin temir jol jelisiniń qurylysy jobasy da bar.
Al jolaýshylar tasymaly qyzmetin ári qarai jaqsartý úshin biyl jyly 100 jańa vagon satyp alý josparlanyp otyr. Ministrlik sonymen qatar múmkindigi shekteýli jandar úshin temirjolmen jolaýshylar tasymaldaýdyń qoljetimdiligin qamtamasyz etýde maqsatty túrde jumys júrgizýde.
Qazirgi ýaqytta 44 baǵytta 98 dana arnaýly vagon-kýpe júredi jáne vagondardyń ishinde erkin qozǵalatyn, túskende jáne mingende qoldanylatyn múgedekterge arnalǵan arbalar bar. Sondai-aq áleýmettik mańyzdy baǵyttar boiynsha júrýge 50 paiyzdyq jeńildik qarastyrylǵan.
Turǵyndardyń ómir sapasyn arttyrý maqsatynda Qazaqstanda «Nurly jer» baǵdarlamasy iske asyrylyp jatyr. Búgingi tańda bir turǵynǵa shaqqanda baspanany paidalanýǵa berý kórsetkishi 0,71 sharshy metrge jetti. Bul TMD elderi ishinde eń joǵary kórsetkish jáne damyǵan elderdiń deńgeiine jaqyndady. Biyl 15 mln sharshy metr baspana salý jáne 39 myń otbasyna memlekettik qoldaý kórsetý josparlanyp otyr.
Zańnamalyq qyzmet aiasynda kóppáterli turǵyn úilerdi basqarý organdarynyń, turǵyn úi-qurylys kooperativteriniń qyzmetin retteitin turǵyn úi qurylysy zańnamasyna ózgerister jáne jalpy múlikti kúrdeli jóndeýdiń jańa tetigi engizildi.
Qazirgi ýaqytta Memleket basshysynyń tapsyrmasyn iske asyrý úshin «Turǵynúiqurylysjinaqbanki» bazasynda «Otbasy bank» damý jáne qoldaý tolyqqandy institýtyn qurý arqyly turǵyn úi saiasatyn damytýdyń ári qaraiǵy sharalary pysyqtalýda. 2020 jyldyń sońyna deiin «Otbasy bankke» jergilikti atqarýshy organdarda kezekte turǵyndardyń derekqoryn berip, memlekettik bazalarǵa tolyq qoljetimdilikti qamtamasyz etý josparlanǵan.
Memleket basshysynyń 2020 jylǵy 1 qyrkúiekte Qazaqstan halqyna arnaǵan Joldaýyna sáikes jergilikti atqarýshy organdarda kezekte turǵyndardyń baspana máselesin tezirek sheshý úshin jeke turǵyn úi qorynan jaldaý aqysyn sýbsidiialaý (jaldaý aqysynyń 80% deiin) tetigin engizý usynyldy. Munda baspanany jaldaý qunynyń bir bóligin sýbsidiialaý usynylady.
«Otbasy bank» qoldaý kórsetiletinderdi kezekte turǵyndardyń ishinen kelesi sanattar boiynsha anyqtaidy: otbasynyń árbir múshesine shaqqanda 1 eń tómengi kúnkóris deńgeiine deiin kirisiniń bolýy; jaldaý merzimi 5 jylǵa deiin. Muqtaj ekenin rastaǵan jaǵdaida ol merzim uzartylady; jalǵa alynatyn baspananyń ortasha aýdany 60 sharshymetr; ár óńir úshin sharshy metrin jaldaý quny anyqtalady.
Sondai-aq, jumys berýshiniń shyǵyndaryn sýbsidiialaý tetigin engizý jaiy pysyqtalýda. Búgingi tańda elimizde 6,5 myńdai aýyl bolsa, onyń 3,5 myńdaiy bolashaǵy zor aýyl sanalady.
