Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine energiia únemdeý jáne energiia tiimdiligin arttyrý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasy Memleket basshysynyń 2018 jylǵy Qazaqstan halqyna Joldaýynda berilgen tapsyrmasyna sáikes ázirlendi. Maqsaty - kásiporyndardyń energiia tiimdiligine qoiylatyn talaptardy kúsheitý, energiia tiimdiligin arttyrý salasyndaǵy júrgiziletin saiasattyń túpki nátijesine qol jetkizý.
Qujat energiia únemdeý jáne energiia tiimdiligin arttyrý salasyndaǵy zańnama normalaryn jetildirýge baǵyttalǵan. Jalpy Zańnyń 9 babyna ózgeris engizilip, 2 jańa bappen tolyqtyrý kózdelgen. Negizgi baǵyttar - memlekettik energetikalyq tizilim, energiia aýditi, memlekettik baqylaý, biýdjet sektory jáne óńirlik saiasat.
«Birinshiden, eldegi tutyný kóleminiń úshten biri tiesili iri kásiporyndarda energiia únemdeý máseleleri boiynsha jaýapty tulǵalardy engizý usynylady. Olar energiia menedjerleriniń rólin atqarmaq. Sonymen qatar, energetikalyq tizilim aiasynda jeke sektor úshin aqparat tizbesin ońtailandyrý usynylady. Memlekettik sektor úshin avtomattandyrylǵan jylý pýnktimen qamtamasyz etý týraly jáne basqa da aqparatpen tolyqtyrý arqyly keńeitý kózdeledi. Maqsat - eń ozyq tájiribelermen ári qarai salystyrý jáne usynystar daiyndaý», - dedi QR Indýstriia jáne infraqurylymdyq damý ministri Beibit Atamqulov.
Onyń aitýynsha, energiia aýditorlaryna úmitkerlerdi attestattaý fýnktsiialaryn qyzmetkerlerdiń laiyqtylyǵyn rastaityn organdarǵa berý usynylady. Bul shara sala sarapshylarynyń kásibi deńgeiin arttyrýǵa yqpal etip, energiia aýditiniń sapasyn jaqsartady.
Budan bólek, zań jobasynda energiia aýditterin tolyq, maqsatty jáne jedel energiia aýditi etip jikteý kózdelgen.
«Energiia únemdeý saiasatyn iske asyrýda jergilikti atqarýshy organdar mańyzdy ról atqarady. Búginde jergilikti jerlerde energiia únemdeý sharalaryna baǵyttalǵan baǵdarlamalar joq.
Osyǵan bailanysty jergilikti atqarýshy organdarǵa úsh jylǵa arnalǵan jol kartalaryn qabyldaý jáne iske asyrý quzyretin berý usynylady», - dedi ministr.
Beibit Atamqulovtyń sózine qaraǵanda, energiia únemdeýdiń eleýli áleýeti bar biýdjet sektoryn retteýdi kúsheitý jáne biýdjet shyǵyndaryn azaitý maqsatynda tiisti quraldar usynyldy.
Osy oraida:
- Memlekettik mekemelerde energiia únemdeýdi qamtamasyz etetin, sonymen birge energiia tutynatyn jabdyqtar naryǵyn qaita qurýǵa serpin beretin Energiia tiimdi memlekettik satyp alýdy engizý.
- Energiia tutyný normativterin qabyldaý, olardyń saqtalýyna monitoring júrgizý, benchmarking jáne energiia tiimdilik boiynsha tiisti usynymdar berý.
