Indýstriia jáne infraqurylymdyq damý ministri Beibit Atamqulov halyq aldyndaǵy esebi kezinde aqyly joldardyń máselesine toqtaldy, dep habarlaidy QazAqparat.
«3-4 kún buryn alysqa qatynaityn júk kóliginiń júrgizýshileri jańa ýchaskelerde aqyly júieni engizýge narazylyq bildirgen oqiǵalar boldy. Atalǵan máseleni sheshý úshin ministrliktiń, «QazAvtoJol ulttyq kompaniiasynyń, «Atameken» ulttyq kásipkerler palatasynyń jáne «Kazlogistiks» ókilderi túsindirý jumystaryn júrgizdi», - degen vedomstvo basshysy bul másele sońǵy eki jyl kóleminde «Atameken» UKP-nyń alańynda qoǵamdyq uiymdar men Qazaqstannyń tasymaldaýshylar odaǵynyń ókilderin qatystyra otyryp talqylanǵanyn eske saldy.
«Aqyly joldar tájiribesi álem keń taralǵan. Kóptegen elderde «Joldy kim paidalansa, kútip ustaý shyǵynyn sol tóleidi» degen ádil qaǵida jolǵa qoiylǵan. Óitkeni kóp jaǵdaida jol tósemin paidany ǵana oilaityn inertti materialdar tasymaldaýshy aýyr júk kólikteri buzyp jatyr. Onyń ústine úshinshi elderden on myńdaǵan tranzittik júk mashinalary Qazaqstan aýmaǵy arqyly ótedi. Olar da joldyń búlinýine áser etedi. Al bizdiń tasymaldaýshylar ózge elderdiń aýmaǵy arqyly ótkende barlyq alymdardy tóleidi ǵoi», - dedi Beibit Atamqulov.
Onyń aitýynsha, 2025 jylǵa deiin avtomobil joldarynyń 11 myń shaqyrymyna aqyly júieni engizý josparlanǵan.
«Birinshi kezeńde 2021 jyly 5,8 myń shaqyrym aqyly jol ashý josparlanýda. Keshegi aqparat sál burmalaǵan. Tasymaldaýshylarmen qosymsha jumys isteimiz dep oilaimyn. Jóndelmegen joldar aqyly bolmaitynyn basa aitqym keledi. Birinshi kezekte jóndelgen, eshqandai aqaýy joq joldar aqyly bolady. Iaǵni, 1 sanattaǵy joldar aqyly bolady.
Odan keiin ekinshi sanattaǵy joldarǵa kóshemiz. Batys Qazaqstan men Aqtóbedegi, Oraldaǵy kólik ieleriniń narazylyǵyn estip qalǵan bolatynmyn. Negizinde Aqtóbe oblysyndaǵy joldardy aqyly etý josparda joq. Ol jaqta joldar 2025 jylǵa deiin jóndeýden ótip, talapqa sai bolýy kerek. Ulttyq standart boiynsha sanaty anyqtalady. Osydan keiin ǵana aqyly negiz engiziledi», - dedi ministr.
