Aqmola oblysyndaǵy Bestóbe altyn kenishindegi shahtadan altyndy zańsyz izdeýmen ainalysqan taǵy bir adamnyń máiiti tabyldy, dep habarlaidy QazAqparat.
«Búgin Bestóbe kenishindegi «Zapadnaia» shahtasynan 610 metr tereńdikte júrgizilgen tekseris barysynda 3 adam anyqtaldy. Onyń biri óli kúiinde tabylsa, ekinshisi túrli dene jaraqatyn alǵan», - dedi «Altynalmas» AK» aktsionerlik qoǵamynyń baspasóz qyzmetinen.
Mekemeden atap ótkendei, shahtadan tabylǵan adamdardyń ekeýi Zavodskoi aýylynyń turǵyndary, úshinshisi Jańa Qarabulaq aýylynyń turǵyny.
«Shahta ishinen tabylǵan adamdardyń barlyǵy da Bestóbe kenishiniń jumysshylary emes. Úsheýi de birneshe ret, sonyń ishinde kúzetiletin nysandarǵa zańsyz kirgeni úshin jaýapqa tartylǵan», - dedi AQ-tan.
Anyqtalǵandai, atalǵan úsh adam altyn kenin zańsyz óndirýmen ainalysqan. Olardy shahta ishinde opyrylǵan tas úiindisi basyp qalǵan.
Aita ketsek, atalmysh shahtanyń jumys istemei turǵanyna bir jyldai ýaqyt bolǵan. Ishi jerasty sýyna toly, sondai-aq jeldetý jáne basqa da injenerlik júieleri isten shyqqan. Sondyqtan shahtaǵa kirý adam ómiri úshin qaýipti.
