Foto: golos-naroda.kz
Shymkenttiń burynǵy ákiminiń aǵasy men burynǵy jubaiy arasyndaǵy kóp jyldyq múlik daýy aiaqtaldy, dep habarlaidy Ult.kz Alash.KZ saityna silteme jasap.
Shymkenttiń eks-ákimi Murat Áitenovtiń aǵasy Marat Áitenov pen onyń burynǵy jubaiy Dana Áteshova arasyndaǵy uzaqqa sozylǵan sot tartysy óz máresine jetti.
2024 jyly maýsym aiynda qoǵamnyń nazaryn aýdarǵan janjal kezinde Marat Áitenov burynǵy áieli men balalaryn Astanadaǵy kottedjinen kúshpen shyǵaryp jibergeni úshin synǵa ushyraǵan edi.
Bul oqiǵa áleýmettik jelilerde keńinen talqylanyp, qoǵamda sheneýnikterdiń otbasy etikasy men jaýapkershiligine qatysty pikirtalas týǵyzǵan bolatyn.
Bes jylǵa sozylǵan sot daýy men birneshe márte keiinge shegerilgen protsesterden keiin Dana Áteshova áleýmettik jelidegi paraqshasynda eki taraptyń mediatsiialyq kelisimge kelgenin habarlady.
«Toǵyz jyl neke, bes jyldyq sot protsesi — ekeýmiz úshin de aýyr synaq boldy. Emotsiialar, renish pen kúres kóp boldy. Degenmen biz aqyry mámilege kelip, múlikke bailanysty mediatsiialyq kelisimge qol qoidyq. Sot ony maquldady, eki tarap ta kelisimge riza», – dep jazdy Áteshova.
Onyń aitýynsha, taraptar múlikti bólý máselesin beibit jolmen sheshse de, aliment tóleý týraly naqty kelisimge áli kelgen joq.
Buǵan deiingi sot materialdaryna sáikes, daý astanalyq elitalyq turǵyn úidegi páter men birneshe kólikke qatysty bolǵan. Sonymen qatar, kei derekter boiynsha, áiel men balalardyń atyna tirkelgen keibir múlik sot sheshimimen qaita qaralǵan.
Qoǵam belsendileri bul isti «joǵary laýazymdy tulǵalardyń otbasylyq jaýapkershiligi men zań aldyndaǵy teńdigine synaq» dep baǵalaǵan.
Aita ketsek, Murat Áitenov 2020–2023 jyldar aralyǵynda Shymkent qalasynyń ákimi qyzmetin atqarǵan. Onyń aǵasy Marat Áitenov te túrli memlekettik qurylymdarda jáne biznes jobalarda aty atalyp kelgen tulǵa retinde belgili.
Mediatsiialyq kelisimmen aiaqtalǵan bul is qoǵamda «biliktegi adamdar da zań aldynda jaýapty bolýy tiis» degen pikirlerdi qaita qozǵady.
