Foto: BaigeNews.kz/Baýyrjan Jýasbaev
Bas prokýratýra Túrkistan oblysyndaǵy kámeletke tolmaǵan qyzdyń ólimine qatysty málimdeme jasady, - dep habarlaidy "Ult aqparat" vedomstvonyń baspasóz qyzmetine silteme jasap.
13 shildede Túrkistan oblysynyń Saryaǵash aýdanynda zorlyq-zombylyqpen óltirilgen kámiletke tolmaǵan qyzdyń máiiti tabyldy. Sol kúni politsiia qyzmetkerleri bul qylmysty jasady degen kúdikpen buryn birneshe ret sottalǵan G.-ny ustady jáne ýaqytsha ustaý izoliatoryna qamady. Osy fakt boiynsha Qylmystyq kodekstiń 99-babynyń 3-bóligi (jas balany óltirý) boiynsha sotaldy tergeý bastaldy.
Memleket basshysynyń tapsyrmasy boiynsha oqiǵanyń barlyq mán-jaiy anyqtalyp jatyr.
"Kúdikti G. 2006 jyly adam óltirgeni úshin 10 jylǵa bas bostandyǵynan aiyrý jazasyna sottalǵany anyqtaldy.
Al 2023 jyldyń mamyrynda G. ishimdik iship otyryp, aýyldasymen janjaldasqan, keiin ony baltamen urǵan. Bul joly sot G.-nyń jábirlenýshimen tatýlasqanyn jáne burynǵy sottylyǵy ótelgenin eskere otyryp, oǵan probatsiialyq baqylaý belgileýmen 3 jyl bas bostandyǵyn shekteý taǵaiyndaǵan.
Bas prokýratýra bul úkimge jazany qatańdatý jáne bas bostandyǵynan aiyrý jazasyn taǵaiyndaý týraly kassatsiialyq narazylyq keltirdi.
Probatsiialyq baqylaýda bolǵan G.-nyń asa aýyr qylmys jasaǵany eskerilip, probatsiia qyzmetiniń qyzmetkerlerine qatysty salǵyrttyq faktisi boiynsha sotqa deiingi tergep-tekserý bastaldy, - delingen habarlamada.
Vedomstvo málimetinshe, Memleket basshysynyń tapsyrmasyna sáikes adamǵa qarsy asa qaýipti qylmystar úshin qylmystyq jaýapkershilikti kúsheitýge baǵyttalǵan zańnamalyq túzetýler blogy daiyndalyp jatyr. Osy qylmystar boiynsha sanktsiialardy qaita qaraý, jazalardy taǵaiyndaý jáne odan bosatý, sottylyǵyn óteý tártibin, jeke adamǵa qarsy aýyr jáne asa aýyr qylmystar úshin jazasyn ótep jatqan adamdarǵa ákimshilik qadaǵalaýdy belgileý sharttaryn ózgertý máseleleri pysyqtalýda.
Qylmystyq istiń tergeý barysy Bas prokýrordyń jeke baqylaýyna alyndy.
Eske salaiyq, buǵan deiin Túrkistan oblysynda kámeletke tolmaǵan qyz aýyl turǵynynyń úiinen óli tabylǵany habarlanǵan edi. Keiin Prezident Qasym-Jomart Toqaev bul isti nazaryna alǵanyn aityp, Bas prokýratýra men Ishki ister ministrligine bolǵan qaiǵyly oqiǵanyń mán-jaiyn muqiiat tekserýdi tapsyrdy.
