Almaty oblysynyń Jambyl aýdanyna qarasty aýyldardaǵy meshitterde urlyq jasaǵan kúdikti ustaldy. 22 jastaǵy jigit qaiyrymdylyqqa berilgen qarajatty qoldy qylǵan, dep habarlaidy "Ult aqparat".
«2019 jyldyń 16 -17 shildesinde Jambyl aýdandyq politsiia bóliminiń kezekshiligine eki aryz túsken. Birinshi jaǵdaida beitanys azamat imamǵa óziniń jumys izdep júrgenin alǵa tartyp, ýaqytsha meshitte qalýǵa ruqsat suraǵan. Al imam ketip qalǵan kezde ol qulypty buzyp, qaiyrymdylyqqa túsken qarajatty urlap, boi tasalaǵan. Ekinshi jaǵdaida, ury túnde meshit jabylmaitynyn paidalanyp, oǵan tańǵy saǵat 5-te kirip, qulypty buzý arqyly taǵy da qaiyrymdylyqqa túsken qarajatty urlap ketken. Qylmys ornynan ketip bara jatyp, osy kóshedegi jeke úilerdiń biriniń aýlasynan velosiped urlaǵan», - delingen Almaty oblystyq politsiia departamentiniń baspasóz qyzmeti taratqan aqparatta.
Bir aiǵa sozylǵan izdestirý barysynda kúdikti qolǵa tústi. Ustalǵan 22 jastaǵy azamattyń turǵylyqty meken-jaiy joq, jumyssyz.
Tekserý barysynda kúdikti buryn Ońtústik Qazaqstan, qazirgi Túrkistan oblysynda urlyq jasaǵany úshin ustalǵany anyqtaldy. Biraq sot onyń isine qatysty taraptardyń tatýlasýyna bailanysty toqtatylǵan. Tergeý barysynda ustalǵan azamattyń Úmbetaly, Qainazar, Eńbekshi aýyldaryndaǵy úsh meshittegi urlyqqa qatysy bar ekeni anyqtaldy. «Olardyń barlyǵy túngi ýaqytta qaiyrymdylyqqa arnalǵan jáshikterdiń qulyptaryn buzý arqyly jasalǵan. Kúdiktiniń bóten múlikti urlaýdyń 6 faktisine qatysy bar. Onyń beseýi meshitterde bolǵan. Barlyq shyǵyndar eseptelýde. Sotqa deiingi tergeý júrip jatyr», -dep tolyqtyrdy atalǵan vedomstvo qyzmeti.
