الماتى وبلىسىنىڭ جامبىل اۋدانىنا قاراستى اۋىلدارداعى مەشٸتتەردە ۇرلىق جاساعان كٷدٸكتٸ ۇستالدى. 22 جاستاعى جٸگٸت قايىرىمدىلىققا بەرٸلگەن قاراجاتتى قولدى قىلعان, دەپ حابارلايدى "ۇلت اقپارات".
«2019 جىلدىڭ 16 -17 شٸلدەسٸندە جامبىل اۋداندىق پوليتسييا بٶلٸمٸنٸڭ كەزەكشٸلٸگٸنە ەكٸ ارىز تٷسكەن. بٸرٸنشٸ جاعدايدا بەيتانىس ازامات يمامعا ٶزٸنٸڭ جۇمىس ٸزدەپ جٷرگەنٸن العا تارتىپ, ۋاقىتشا مەشٸتتە قالۋعا رۇقسات سۇراعان. ال يمام كەتٸپ قالعان كەزدە ول قۇلىپتى بۇزىپ, قايىرىمدىلىققا تٷسكەن قاراجاتتى ۇرلاپ, بوي تاسالاعان. ەكٸنشٸ جاعدايدا, ۇرى تٷندە مەشٸت جابىلمايتىنىن پايدالانىپ, وعان تاڭعى ساعات 5-تە كٸرٸپ, قۇلىپتى بۇزۋ ارقىلى تاعى دا قايىرىمدىلىققا تٷسكەن قاراجاتتى ۇرلاپ كەتكەن. قىلمىس ورنىنان كەتٸپ بارا جاتىپ, وسى كٶشەدەگٸ جەكە ٷيلەردٸڭ بٸرٸنٸڭ اۋلاسىنان ۆەلوسيپەد ۇرلاعان», - دەلٸنگەن الماتى وبلىستىق پوليتسييا دەپارتامەنتٸنٸڭ باسپاسٶز قىزمەتٸ تاراتقان اقپاراتتا.
بٸر ايعا سوزىلعان ٸزدەستٸرۋ بارىسىندا كٷدٸكتٸ قولعا تٷستٸ. ۇستالعان 22 جاستاعى ازاماتتىڭ تۇرعىلىقتى مەكەن-جايى جوق, جۇمىسسىز.
تەكسەرۋ بارىسىندا كٷدٸكتٸ بۇرىن وڭتٷستٸك قازاقستان, قازٸرگٸ تٷركٸستان وبلىسىندا ۇرلىق جاساعانى ٷشٸن ۇستالعانى انىقتالدى. بٸراق سوت ونىڭ ٸسٸنە قاتىستى تاراپتاردىڭ تاتۋلاسۋىنا بايلانىستى توقتاتىلعان. تەرگەۋ بارىسىندا ۇستالعان ازاماتتىڭ ٷمبەتالى, قاينازار, ەڭبەكشٸ اۋىلدارىنداعى ٷش مەشٸتتەگٸ ۇرلىققا قاتىسى بار ەكەنٸ انىقتالدى. «ولاردىڭ بارلىعى تٷنگٸ ۋاقىتتا قايىرىمدىلىققا ارنالعان جەشٸكتەردٸڭ قۇلىپتارىن بۇزۋ ارقىلى جاسالعان. كٷدٸكتٸنٸڭ بٶتەن مٷلٸكتٸ ۇرلاۋدىڭ 6 فاكتٸسٸنە قاتىسى بار. ونىڭ بەسەۋٸ مەشٸتتەردە بولعان. بارلىق شىعىندار ەسەپتەلۋدە. سوتقا دەيٸنگٸ تەرگەۋ جٷرٸپ جاتىر», -دەپ تولىقتىردى اتالعان ۆەدومستۆو قىزمەتٸ.
