Elordanyń politsiia departamenti órtenip ketken bes búldirshinniń ólimine qatysty qylmystyq isti toqtatty, dep habarlaidy Sputnik Qazaqstan.
Politsiia departamenti basshysynyń orynbasary Ǵaziz Nurqaevtyń aitýynsha, atalǵan isti qalalyq departamenttiń tergeý basqarmasy júrgizgen. Endi, tergeýshilerdiń sheshimin prokýrorlar tekseredi.
"Bes qyzdyń ólimi boiynsha biz tolyqqandy tergeý júrgizdik. Onymen departamenttiń tergeý basqarmasy ainalysty. Barlyq zertteý men saraptamalar, sondai-aq, tergeý sharalary atqarylǵannan keiin atalǵan qylmystyq isti toqtatý týraly sheshim qabyldandy. Qazirgi kezde ol qalalyq prokýratýraǵa tapsyryldy. Olar atalǵan sheshimniń zańdylyǵyn tekseredi", - dedi Nurqaev elordada ótken baspasóz máslihatynda.
Onyń sózine qaraǵanda, tekseris kezinde peshtiń qalai salynǵany da anyqtaldy. Ony qyzdardyń ákesi ózi salǵan.
"Peshti salǵanda qaýipsizdik erejeleri saqtalmaǵan. Peshtiń qubyry men shatyrdyń ústine jabylǵan materialdyń arasyna eshteńe salynbapty. Sodan órt shyqqan. Ol "vremiankany" resmi túrde tirkemegen. Jaýapkershilikke úidiń iesi ǵana tartylady. Al bul jerde ata-ananyń ózi iesi bolyp sanalady", - dep atap kórsetti Nurqaev.
Eske sala ketsek, aqpannyń úshinen tórtine qaraǵan túni Astanadaǵy Kóktal-1 turǵyn úi alabynda "vremianka" órtenip, 2006, 2008, 2013, 2015 jáne 2018 jyly týǵan bes bala kóz jumdy. Qaza bolǵandardyń barlyǵy – qyz bala. Eń kishisiniń týǵanyna úsh ai ǵana bolǵan. Balalardyń ata-anasy túngi ýaqytta jumysta bolǵan.
