QR Ishki ister vitse-ministri Iýrii Ilin bes qyzdyń ómirin qiyp ketken qaiǵyly oqiǵanyń aldyn ala sebebin jariialady, dep xabarlaidy "Ult aqparat".
Onyń aitýynsha, órt shyqqan qurylys nysany ýaqytsha turýǵa arnalǵan. Ol jerde týra sondai birneshe nysandar bar. Iesi - qaitys bolǵan balalardyń anasynyń úlken apasy.
«Aldyn ala qorytyndyǵa sáikes, balalar iis tiip, qaitys bolǵan. Bul degenińiz - úidiń tóbesi opyrylyp qulaǵanda barlyǵy es-tússiz jatqan», - dedi Iu.Ilin jýrnalisterge bergen suxbatynda.
Vitse-ministrdiń sózine qaraǵanda, qaiǵyly jaǵdaiǵa tap bolǵan otbasynyń týystary jarty saǵat buryn balalardy kórip ketken. Pesh te durys istep turǵan. Al túngi saǵat 2:34 kórshiler órt sóndirý qyzmetine xabar bergen.
«Ortalyq pýltke órt týraly aqpar túngi saǵat 02:34-te kórshisinen kelip tústi. Shyńǵystaý kóshesinde ornalasqan "Kóktal 1" turǵyn úi massivinde órt shyqqan. Órt sóndirýshilerdiń alǵashqy brigadasy oqiǵa ornyna jóneltildi. Eki minýttan keiin barlyq ózara is-qimyl qyzmetterine, iaǵni jedel járdem stantsiiasyna, politsiiaǵa habar berildi.
Órt sóndirýshiler oqiǵa ornyna kelgen kezde, aýmaǵy 30 sharshy metr ýaqytsha qurylystyń jalynǵa oranǵanyn baiqaidy. Órtti sóndirý kezinde saǵat 02:45-te úidiń tóbesi jarym-jartylai qulaǵan, al 02:53-te bes máiit tabyldy.
Órt neden shyqty? Dalaǵa shyǵatyn murjanyń asbest qaptamasy bolmaǵan. Sodan aǵash shatyr órtendi. Onyń ústine balalar túngi ýaqytta eresekterdiń qaraýynsyz qalǵan. Qazir arnaiy zertxana jumys istep jatyr. Sonyń qorytyndysy boiynsha naqty sebepter belgili bolady», - dep atap kórsetti Iu.Ilin.
Aita keteiik, 4 aqpan kúni túnde elordanyń Saryarqa aýdanyndaǵy Kóktal-1 turǵyn alabynda órt shyqty. Órtti sóndirý barysynda 2006, 2008, 2014, 2016, 2018 jyly dúniege kelgen 5 balanyń denesi tabyldy. Eń kishisi nebári úsh ailyq sábi edi.
Órt kezinde bes balanyń ata-anasy túngi jumysta bolǵan.
Úidiń otaǵasyn túngi ýaqytta jumys berýshisi shaqyryp alǵan. Ol tehnikalyq qyzmet kórsetý stantsiiasynda jumys istegen.
«Tergeý organdarynyń aqparatyna sáikes, balalardyń ákesi - 1984 jyly týǵan azamat. Ol texnikalyq qyzmet kórsetý stansasynda motorist bolyp isteidi. Keshki ýaqytta ol peshti jaǵyp qoiǵan. Sol kezde jumys berýshi ony shuǵyl jumysqa shaqyryp alady. Sol sebepti ol túngi ýaqytta úiinde bolmai qalady. Al, anasy jaýapkershiligi shekteýli seriktestikte bólshektep ólsheýshi bolyp qyzmet atqarady. Ol da túngi aýysymda bolǵan», - dep atap kórsetti Iu.Ilin.
Sondai-aq QR Ishki ister ministrligi órttiń saldarynan bolǵan qaiǵyly oqiǵalardyń statistikasyn jariialady.
Vitse-ministr Iýrii Ilinniń aitýynsha, ótken jyly respýblika boiynsha 14 567 órt oqiǵasy tirkeldi. Ol bir jyl buryn bolǵan kórsetkishten 6 protsentke tómen. Biraq órt saldarynan qaitys bolǵan adamdardyń sany 19 protsentke ósip, 434 adamǵa jetti. Bir jyl buryn atalǵan kórsetkish 352 adam bolǵan. "Budan bólek, ótken jyly 412 adam jaraqat aldy. Jalpy, materialdyq shyǵynnyń kólemi 3,5 milliard teńgeden asty", - dedi Iu.Ilin.
Al Astana qalasyn boiynsha byltyr 699 órt oqiǵasy tirkelgen. Sol kezde 10 adam qaitys bolǵan. Olardyń ishinde bir bala bar. 2019 jyldyń basynan beri elordada 69 órt oqiǵasy boldy. Búgin qaiǵyly oqiǵada qaitys bolǵan bes bala - biylǵy jyldyń alǵashqy qurbandary.
