sýret ashyq derekkózden alyndy
Jyl basynan beri elimizde elektrosamokattarǵa qatysty on jol apaty tirkeldi. Saldarynan bir adam qaza boldy. Bul týraly Ishki ister ministrligi Ákimshilik politsiia komitetiniń tóraǵasy Qaisar Sultanbaev málimdedi, dep habarlaidy Sputnik Qazaqstan.
"2023 jylǵy bes aidyń ishinde respýblika boiynsha samokatshylardyń qatysýymen 10 jol apaty boldy. Bul ondai kóp tsifr emes. Bir adam qaitys boldy, 11 adam dene jaraqatyn aldy. On jaǵdaidyń jeteýi Almaty qalasynda tirkeldi", - dedi Sultanbaev Senat kýlýarynda.
IIM ókili elimizde elektrosamokattarǵa arnalǵan infraqurylym joq degen pikirmen kelisti.
"Rasynda da elimizde samokattardyń júrýine arnalǵan arnaiy joldar, infraqurylym tolyǵymen qarastyrylmaǵan. Ony moiyndaý kerek. Almaty, Astana, Shymkent qalalarynda bolýy múmkin. Biraq basqa oblys ortalyqtarynda mundai infraqurylym qarastyrylmaǵan", - dedi komitet tóraǵasy.
IIM Parlament qabyldaǵan zań aiasynda iri qalalarda elektrosamokattar máselesin retke keltirýdi kózdep otyr.
"Osy zań aiasynda jergilikti atqarýshy organdar keleshekte óz aýmaǵynda infraqurylymdy damytady. Sondai tapsyrma da berilip otyr", - dedi ol.
Búgin Parlament Senaty samokat minetinderge talapty kúsheitetin zańdy maquldady. Oǵan sáikes, samokatpen júretinder shlem kiiýge tiis jáne júrgizýshi kýáligi bolýy shart. Al túnde júrse, ústinde jaryq shaǵylystyratyn element bolýǵa tiis.
Zań prezidenttiń qol qoiýyna jiberildi.
