2022 jyly qańtar men mamyr aralyǵynda Resei halqy 430 myńǵa azaiǵan. Muny Rosstattyń ai saiyn jariialaityn "Áleýmettik-ekonomikalyq jaǵdai týraly" esebinen kórýge bolady, dep habarlaidy Azattyq.
Máskeý anneksiialap alǵan Qyrym halqyn qosqanda qazir Resei halqy 145,1 mln adamdy quraidy. Bul – 2014 jyldan bergi eń tómengi kórsetkish. Qyrymdy eseptemegende, Resei halqy – 142,7 mln adam.
Moscow Times basylymynyń jazýynsha, 2022 jyldyń alǵashqy ailarynda Resei halqy aiyna ortasha eseppen 86 myńǵa azaiyp otyrǵan. Mundai kórsetkish tipti koronavirýs indeti kúsh alyp turǵan tusta tirkelmegen.
Degenmen "Rosstat" málimetinshe, qańtar-mamyr aiynyń qorytyndysy boiynsha Reseide byltyrmen salystyrǵanda adam ólimi kórsetkishi azaiǵan. Bes ai ishinde 355 myń adam qaitys bolǵan. Elde jańa týǵan árbir nárestege ortasha eseppen 1,7 qaitys bolǵan adamnan keledi. Adam ólimi kórsetkishi azaisa da, halyq sanynyń azaiýyna migranttardyń óz elderine oralýy áser etken.
Statistikaǵa Ýkrainada soǵys bastalǵaly beri Reseiden ketkender enbei qalǵan tárizdi. Túrli málimet boiynsha, olardyń sany júzdegen adamǵa jetýi yqtimal. Olardyń basym bóligi turaqty tirkeýden alynbaǵandyqtan, Reseide turaqty turyp jatqan azamattar retinde sanalady.
