QR Ortalyq sailaý komissiiasynda Qazaqstan Respýblikasy máslihattary depýtattarynyń kezekti sailaýynyń qorytyndylary jáne daýys berý qorytyndylary boiynsha arnalǵan otyrys ótti, dep habarlaidy "Ult aqparat".
Otyrysqa saiasi partiialardyń ókilderi, onlain rejiminde oblystardyń, Nur-Cultan, Almaty jáne Shymkent qalalarynyń aýmaqtyq sailaý komissiialary qatysty.
Ortalyq sailaý komissiiasynyń tóraǵasy Berik Imashev otyrysty asha otyryp, máslihattar depýtattaryn sailaý qorytyndylaryn anyqtaý jónindegi ókilettikter aýmaqtyq sailaý komissiialaryna tiesili ekenin atap ótti. Tiisti jumystardy oblystardyń, Nur-Sultan, Almaty, Shymkent qalalarynyń aýmaqtyq sailaý komissiialary barlyq 216 máslihat boiynsha júrgizdi.
Osyǵan bailanysty otyrysta Qazaqstan Respýblikasy máslihattary depýtattarynyń kezekti sailaýynyń qorytyndylary jáne daýys berý qorytyndylary boiynsha máslihattardyń depýtattyq mandattaryn bólý týraly aýmaqtyq sailaý komissiialarynyń esepteri tyńdaldy.
«Sailaý naýqanynda atqarylǵan jumystar úshin barshańyzǵa alǵys aitamyn. Osy arqyly máslihat boiynsha sailaý naýqanyn aiaqtadyq. Máslihat depýtattary alǵash ret proportsionaldy sailaý júiesi boiynsha sailandy. Bul 2007 jylǵy konstitýtsiialyq reformanyń qisyndy jalǵasy bolyp sanalady, respýblikalyq jáne jergilikti deńgeilerde ókildi organdardy qalyptastyrý jónindegi tásilderdi birizdendiredi», - dedi Berik Imashev.
Onyń aitýynsha, «QR Sailaý týraly» Konstitýtsiialyq zańyna sáikes depýtattyq mandattardy bólý kezektiligin saiasi partiianyń tiisti filialynyń basshy organy sailaý qorytyndylary jariialanǵan kúnnen bastap bes kúnnen keshiktirmei aiqyndaidy.
Máslihattar depýtattaryn sailaý qorytyndylary týraly habardy tiisti aýmaqtyq sailaý komissiialary jergilikti buqaralyq aqparat quraldarynda jariialaidy.
