Barlyq deńgeidegi sailaý komissiialary sailaýdy uiymdastyrý týraly Jarlyqtyń oryndalýyn qamtamasyz etti. Bul týraly Ortalyq sailaý komissiiasynyń tóraǵasy Berik Imashev málim etti, dep habarlaidy "Ult aqparat".
«Búgin biz elde sońǵy úsh aiǵa sozylǵan sailaý naýqanyn aiaqtadyq. Barlyq deńgeidegi sailaý komissiialary 2021 jylǵy 10 qańtarǵa belgilengen Qazaqstan Respýblikasy Parlament Májilisi depýtattarynyń sailaýyn uiymdastyrý jáne ótkizý týraly Prezident Jarlyǵynyń oryndalýyn qamtasyz etti. Sailaýdyń sońǵy qorytyndylary shyǵaryldy», - dedi B. Imashev.
Osy oraida ol qorytyndy málimetter boiynsha Parlament Májilisiniń depýtattary sailaǵanyn atap ótti.
«Barshańyzdy osy mańyzdy memlekettik jáne saiasi oqiǵamen quttyqtaimyn. Sailaýdy uiymdastyrýshylarǵa oryndaǵan jumysy úshin, halyqaralyq ári ulttyq baiqaýshylardyń sailaý protsesiniń ashyqtyǵyn qamtamasyz etýge járdemdeskeni úshin, al sailaýshylardyń belsendi azamattyq ustanymy úshin alǵys aitamyn», - dedi OSK tóraǵasy.
Budan buryn habarlanǵandai, QR Ortalyq sailaý komissiiasy 10 qańtar kúni ótken QR Parlamenti Májilisi depýtattaryn sailaýynyń qorytyndysyn shyǵardy.
Qazaqstan Halyq partiiasyna 659 019 (9,10 paiyz), «Nur Otan» partiiasy – 5 148 074 (71,09%), «Aýyl» halyqtyq-demokratiialyq patriottyq partiiasy 383 023 (5,29 paiyz), Qazaqstannyń «Aq jol» demokratiialyq partiiasy – 792 828 (10,95 paiyz), «ADAL» saiasi partiiasy 258 618 (3,57 paiyz) daýys jinady.
OSK jariialaǵan sailaý qorytyndysy boiynsha Májilistegi depýtattyq mandanttar bylai bólindi: «Nur Otan» partiiasy – 76 mandat, Qazaqstannyń «Aq jol» demokratiialyq partiiasy –12 mandat, Qazaqstan Halyq partiiasyna - 10 mandat.
Sonymen qatar, Parlament Májilisine Qazaqstan halyq Assambleiasynan 9 depýtat sailandy.
