Ulttyq qoǵamdyq senim keńesiniń múshesi Berik Ábdiǵaliuly keńestiń búgingi otyrysynda memlekettiń bolashaǵyna tikelei qatysty, el ishindegi eń negizgi máseleler kóterilgenin málim etti, dep habarlaidy QazAqparat.
«Bul alǵashqy otyrys bolǵannan keiin óte jiti daiyndyqpen, salmaqty ótti. Kóptegen emotsiialyq usynystar bar edi. Meniń oiymsha, ony kelesi jolǵa qaldyryp otyr. Biraq, eń basty, negizgi, memleketimizdiń damýyna qatysty máseleler sóz joq, kóterildi. Saiasi reformalardyń mańyzy qozǵalyp, naqty ekonomikalyq usynystar berildi. Tilimizdiń, ulttyq rýhtyń áńgimesi aityldy. Eń negizgi, basym baǵyttaǵy máseleler kóterildi», - dedi Berik Ábdiǵaliuly Ulttyq qoǵamdyq senim keńesiniń otyrysynan keiin tilshilerge bergen suhbatynda.
Keńes múshesiniń aitýyna qaraǵanda, aldaǵy ýaqytta áleýmettik máselelerdiń birshamasy aitylatynyn atap ótti.
«Bul joly memleketimizdiń bolashaǵyna tikelei bailanysty, turaqtylyǵy men damýyna qatysty máseleler aitylǵanyn taǵy da aita keteiin. Biraq, aitylmaǵan jaittar áli bar. Bizdiń keńes músheleri kelesi otyrysta soǵan daiyndalady. Meniń ózim Ulttyq keńestiń áleýmet jáne mádeniet tobyndamyn. Memlekettik tilimiz ben tarihymyzǵa qatysty máselelerdi kóteremiz», - dedi Berik Ábdiǵaliuly.
Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótti. Otyrysqa Qazaqstan Prezidenti Qasym-Jomart Toqaev qatysty.
Ulttyq keńestiń quramy belgili memleket jáne qoǵam qairatkerleriniń, saiasi partiialar, úkimettik emes sektor ókilderiniń qatarynan qalyptasady. Qazaqstan Respýblikasy Prezidenti Ákimshiliginiń Basshysy, Qazaqstan Respýblikasyndaǵy Adam quqyqtary jónindegi ýákil, Qazaqstan Respýblikasyndaǵy Bala quqyqtary jónindegi ýákil, Qazaqstan kásipkerleriniń quqyqtaryn qorǵaý jónindegi ýákil óz laýazymdaryna sáikes Ulttyq keńestiń quramyna kiredi.
