2017 jylǵy 16 tamyzda Qazaqstan Respýblikasy Ulttyq mýzeiinde «Qasietti Qazaqstan» ortalyǵynyń Ǵylymi-saraptamalyq keńesiniń otyrysy ótti.
Otyrys maqsaty jalpyulttyq deńgeidegi 100 nysandy belgileý jáne tizimdeý boldy. Is-sharaǵa Memleket tarihy institýtynyń direktory, professor B. Aiaǵan, professor Z. Samashev, Respýblikalyq «Ardagerler uiymy" Ortalyq keńesiniń tóraǵasy, professor Ó.Ozǵanbaev, professor J. Artyqbaev syndy esimderi elge belgili tulǵalar qatysty.
«Qazaqstannyń jalpyulttyq qasietti jerlerin» belgileý maqsatyndaǵy ǵylymi-saraptamalyq keńesi otyrysynyń kún tártibinde atalǵan ortalyqtyń 2 ai ishinde atqarǵan jumysy týraly aqparat berilip, Qazaqstannyń jalpyulttyq deńgeidegi kieli jerlerin anyqtaý, ǵylymi tizimdeý men júieleý máseleleri qozǵaldy.
Ǵalymdar usynylǵan tizimniń jobasyn jan-jaqty talqylap, óz pikirlerin ashyp aitty. T.ǵ.k., professor Zeinolla Samashev: «Bizde tarihi oqiǵalar ótken, biraq dál qazirgi kúni ol jerde eshqandai belgi saqtalmaǵan, eshqandai iz baiqalmaityn jerler bar. Qiraǵan eskertkishterdiń synyǵy nemese jai orny ǵana qalǵan nysandar bar. Alaida tarihi máni óte zor bolǵandyqtan, ol jerdi qurmettep jatamyz. Mysaly, «Tańbaly tasty» alsaq, tolyq qalpyna keltirý jumystaryn qajet etedi. Ol óte mańyzdy nysan. Meniń jeke usynysym, búgingi kúni esh belgisi saqtalmaǵan, biraq tarihi mańyzy bar oryndardy osy tizimge engizgen jón», – dep óz usynysyn aitty.
Qazaqstannyń tarihi-mádeni murasy men áleýmettik-saiasi ómirindegi mańyzdy oryn alatyn qasietti oryndar búginde ulttyq birlik pen jańǵyrý nyshany retindegi nysandar bolmaq. «Qasietti Qazaqstan» ortalyǵynyń aimaqtardan alǵan málimetterine qazaqstandyq ǵalymdar, ólketanýshylar, qoǵam qairatkerleri birlese otyryp, saraptama júrgizedi. Al oblystardaǵy qasietti, kieli jerlerdi anyqtaý úshin jergilikti mádeniet basqarmalarynyń jetekshilik etýimen tarihshylar, ǵalymdar, qoǵam qairatkerlerinen qurylǵan arnaiy toptar jumys isteýde.
Atalǵan ortalyqtyń jetekshisi Berik Ábdiǵaliuly: «Bul – bes jylǵa josparlanǵan joba, biyl jalpyulttyq deńgeidegi, elge keńinen tanylǵan 100 nysandy anyqtaý qolǵa alynǵan. Bul tizim jobasyna búgingi keńestiń qorytyndysy boiynsha, Ulttyq komissiia saraptama jasap, bir, eki ai kóleminde bekitedi. Kesene, eskertkishterdi, arnaiy bir oryndy ǵana emes, biz Elbasynyń maqalasynda atap kórsetilgen sol nysandarmen bailanysty rýhani qundylyqtardy nasihattaimyz. Ol nysan qandai tarihi oqiǵamen, qandai salt-dástúrmen, qai kezeńmen bailanysty ekenin anyqtaimyz. Sol arqyly urpaqqa jat aǵymdardyń bóten piǵylyna qalqan bolatyn rýhani tárbieni sińirý, nasihattaý, nyǵaitýdy maqsat etip otyrmyz», – dep ortalyqtyń maqsatyn aiqyndap aityp berdi.
Sondai-aq ol bul jobadan dini ne ǵylymi negiz izdeýdiń qajeti joǵyn aitty.
Shara barysynda jalpyulttyq deńgeidegi belgilengen 100 nysan elektrondy túrde tanystyryldy.
