Bul - tarixi tulǵanyń tarixi sheshimi. Belgili saiasattanýshy, tarihshy ǵalym, «Qasietti Qazaqstan» ǵylymi-zertteý ortalyǵynyń jetekshisi Berik Ábdiǵali QR Tuńǵysh Prezidenti - Elbasy Nursultan Nazarbaevtyń Qazaqstan Respýblikasynyń Prezidenti retindegi ókilettigin toqtatý jónindegi sheshimine qatysty osylai pikir bildirdi, dep habarlaidy "Ult aqparat".
Ǵalym Elbasy qiyn-qystaý ýaqyttan eldi aman alyp shyqqanyn atap ótti.
«Bul - tarixi tulǵanyń tarixi sheshimi. Nursultan Nazarbaev óz málimdemesinde bilikte bolǵan 30 jylyna sholý jasap, memleket tarihyndaǵy mańyzdy oqiǵalarǵa toqtalyp ótti. Shyn máninde, Tuńǵysh Prezident óte qiyn, kúrdeli kezeńde el tizginin qolyna aldy. Keńestik Qazaqstannan Táýelsiz Qazaqstan qalyptastyrý jolynda úlken jaýapkershilikti moinyna júktedi. Qiyn-qystaý ýaqyttan eldi aman alyp shyqty», - dep jazdy Berik Ábdiǵali áleýmettik jelidegi paraqshasynda.
Onyń aitýynsha, táýelsizdik jyldarynda jańa urpaq ósip-jetilgen. Memlekettiń damý úrdisin jalǵastyratyn tulǵalar qalyptasqan.
«Osynyń bári memlekettik saiasatta sabaqtastyq júretinin kórsetedi. Úlken ózgeris bolady dep oilamaimyn. Nursultan Nazarbaevtyń Tuńǵysh Prezident degen mártebesi saqtalady. Nur Otan partiiasynyń tóraǵasy qyzmetinde qala beredi. Sońǵy ózgeristerge bailanysty Qaýipsizdik keńesi tóraǵasynyń quzyreti keńeidi. Táýelsizdik jyldary Tuńǵysh Prezidenttiń el qýatyn eseleýge qosqan eńbegi men úlesi sheksiz. Qazaq memleketi jańǵyrdy. Shekaramyz belgilenip, memlekettik rámizderimiz anyqtaldy. Táýelsizdik qundylyqtary qalyptasty. Qazaqstan álemge tanylyp, ǵalamdyq saiasi protsesterge belsendi aralasa bastady. Osy 30 jyl qazaq tarixynda «Nursultannyń Nurly joly» degen ataýmen qalady», - dep jazdy Berik Ábdiǵali.
Eske sala ketsek, keshe Nursultan Nazarbaev respýblikalyq telearnalar arqyly Qazaqstan halqyna arnalǵan málimdeme jasap, Qazaqstan Respýblikasynyń Prezidenti retindegi ókilettigin toqtatý jónindegi sheshimin jariia etti.
.jpeg)