Almaty oblysy Ile aýdanyndaǵy «Bereke» indýstrialdy aimaǵynda búginge deiin 8 kásiporyn ornalastyrylǵan. Bolashaqta qurylys, azyq-túlik, kiim-keshek, farmatsevtika salalarynyń nysandary bolatyn bul núktelerde 1600-den astam jumys orny quralady dep josparlanǵan. Indýstrialdy aimaqtaǵy jobalar sanynyń ósýine qarai, jumys oryndarynyń sany budan ári de ósetin bolady. Bul týraly QR Premer-ministriniń orynbasary Jeńis Qasymbektiń Almaty oblysyna jasaǵan jumys sapary kezinde belgili boldy, dep habarlaidy "Ult aqparat" óńir basshysynyń baspasóz qyzmetine silteme jasap.
Oblystyq kásipkerlik jáne indýstrialdy innovatsiialyq damý basqarmasynyń basshysy Rýslan Qojasbaevtyń aitýynsha, «Bereke» indýstraildy aimaǵynyń jalpy kólemi 535 ga. Ázirge onyń aýmaǵynda 8 kásiporyn ornalasýda, olardyń arasynda «Green Land Alatau», «KazAgroTech», «Nur Tóbe» jylyjailary, «Darhan MNM» aiaq kiim fabrikasy, «Mekada» qurylys kompaniiasy jáne basqalary bar. Osy jobalar júzege asyrylǵanda 1620 jańa jumys orny qurylady. Qazirgi kezde olarǵa jer bólý, jobalaý qujattaryn daiyndaý jumystary júrgizilýde. Indýstrialdy aimaqtyń kvartalishkilik injenerlik júiesiniń qurylystaryna aldyn ala esepteý boiynsha 7,6 mlrd. teńge qajet. Memlekettik saraptamadan ótkennen keiin bul soma naqtylatyn bolady.
Sol siiaqty osy jerde vitse-premerge «Gate City» jobasynyń bas josparyna engizilgen, kelisilgen túzetýler týraly baiandaldy. Kvartaldyq jelilerdi esepke alǵandaǵy turǵyn úiler salý kezeńderi, turǵyn aýdandardyń aýmaǵyn abattandyrý, jeke turǵyn úiler salý jóninde keńinen sóz boldy.
Bolat Tákenovtiń aitýynsha, óńir basshysyna berilgen tapsyrmaǵa sáikes ońtústiktegi birinshi qalanyń magistraldyq injenerlik jelileri aiaqtalǵan. Sýmen qamtý júiesiniń jalǵastyrý jelileri, 202 Gkal qýattylyqtaǵy magistraldy jylý trassasy bar sý jylytý qazandyǵy, qosalqy stansalar, 2000 tekshelik sý jinaǵysh jasalǵan. Sol siiaqty turǵyn úilerge tartylatyn kósheishilik injenerlik jelilerdiń qurylysyn jobalaý jumystary da bitken. Olardy salýǵa respýblikalyq biýdjetten qarjy bólinedi. Bul oraida oblys ákimi oblystyq qurylys basqarmasyna áleýmettik nysandardy jobalaý isin bastaýdy tapsyrdy. Sonymen birge Amandyq Batalov turǵyn úiler qurylysyn bastaý jumystaryn qýzaý kerektigin aitty:
- Bizde qazir alańy 600 myń sharshy metr bolatyn turǵyn úiler qurylysy úshin magistraldyq jeliler daiyn. Birinshi kezegi 300 myń sharshy metrdi quraidy. Turǵyn úi massiviniń qurylysyn bastaýdy jyldamdatýdy suraimyz. Sebebi oblysta áli 40 myńnan astam adam úi kezeginde tur. Ásirese, kóp balaly otbasylardy, halyqtyń áleýmettik áljýaz toptaryn baspanamen qamtý qajettiligi bar, - dep atap ótti oblys ákimi.
Baiandamashylardy tyńdaǵan vitse-premer bul másele boiynsha jaýapty tulǵalardyń qatysýymen arnaiy jiyn ótkizetinin aitty.
Sol siiaqty Úkimet basshysynyń orynbasary «Mareven Fýd Tian-Shan» zaýytynda da boldy. Resmi delegatsiia óndiristik tsehtardy, daiyn ónimder qoimasyn aralady. Aralaý barysynda kásiporyn direktory brikettegi jáne jaimadaǵy tez daiyndalatyn «Rollton» kespesin, «Rollton-Domashnii» sorpasyn ázirleý protsesteri týraly aityp berdi.
Sapar sońynda Jeńis Qasymbek bul zaýytty ótken jyly Indýstriialandyrý kúninde Elbasy iske qosqanyn, kásiporynnyń Orta Aziiada teńdesi joq ekenin eske saldy. Zaýytqa memleket tarapynan qajetti qoldaýlar jasalǵan. Eń bastysy, munda 370 jumys orny qurylǵan.
