Jambyl oblysynyń ákimi Berdibek Saparbaevtyń tóraǵalyǵymen ótken keńeste óńirdegi jobalaý-smetalyq qujattamalardy sapaly jáne ýaqytyly daiyndaý máseleleri qaraldy, dep habarlaidy "Ult aqparat" oblys ákiminiń baspasóz qyzmetine silteme jasap.
Búginde jahandyq pandemiia jaǵdaiynda Memleket basshysy ekonomikany qoldaý boiynsha naqty sharalar qabyldaýda. Bul oraida birinshi kezekte qurylys sektoryn jandandyrýǵa baǵyttalǵan túrli memlekettik baǵdarlamalarǵa ózgerister engizilýde. Qurylys sektory arqyly barsha qazaqstandyqtyń áleýmettik ahýalyna oń áser etetin túrli salalardy nyǵaita túsý mańyzdy.
Jambyl oblysyna qosymsha qarajat bólinedi. Biraq olardy igerýge qanshalyqty daiynbyz? Bul rette jobalaý-smetalyq qujatty (JSQ) ýaqytyly daiyndaý jáne memlekettik saraptamadan ótkizý – biýdjettik baǵdarlama ákimshileriniń qashannan beri qalyptasqan máselesi.
Oblystyq qurylys basqarmasynyń basshysy Jaiyqbai Shaldarovtyń aitýynsha, 2014-2018 jyldary bastalǵan 70 JSQ áli kúnge deiin ázirlenip bitpegen. Sondai-aq, energetika jáne TÚKSh basqarmasynyń basshysy Nurlan Aldamjarov ta sol sekildi 20 JSQ týraly baiandady.
«JSQ daiyndaý merziminiń sozylýynyń basty sebebi – jaýapty memlekettik organdar tarapynan baqylaýdyń bolmaýy. Nege tiisti sharalardy qabyldamaisyzdar? 2013 jyldyń jobalaý-smetalyq qujattamasy qazir kimge kerek? Óitkeni, qurylys materialdarynyń baǵasy, tehnologiiasy men talaptary túbegeili ózgerdi. Al memlekettiń aqshasy jelge ushýda. Taǵy bir másele – smetany daiyndaý kezinde baǵany negizsiz kóterý. «Túie surasań – bie alasyń» degen. Mundai tásil durys emes. Biýdjet qarajatyna uqypty qaraý kerek. Ol úshin jańa tehnologiialardy engize otyryp, jergilikti materialdardy paidalaný mańyzdy», - dedi B.Saparbaev.
Sondai-aq, aimaq basshysy J.Shaldarovtyń jiynǵa daiyndyqsyz kelgenin synǵa alyp, N. Aldamjarovqa «Biznestiń jol kartasy-2020» baǵdarlamasy sheńberinde jobalardy kóbeitý boiynsha jumys júrgizý kerektigin alǵa tartty.
«Aýdandarǵa jumys saparymnyń barysynda kásipkerler qajetti infraqurylymdardy júrgizýge kómektesýdi suraidy. Bul baǵyttaǵy jumystar álsiz atqarylýda», - dep atap ótti oblys ákimi.
Óńir basshysy qurylysqa kirispes buryn mindetti túrde geologiialyq barlaý jumystaryn júrgizý, jerasty sýlarynyń qoryn jáne olardyń sapasyn zertteý qajettigine kóńil bóldi.
Oblys ákimi qurylystardyń estetikalyq kelbetine de nazar aýdardy.
«Qurylystyń qasbetteri qatparly nemese sur emes, airyqsha tartymdy bolýy shart. Mektep – bul mádeni mekeme, balabaqsha nemese aýrýhana nysandary birden kózge kórinip turýy kerek. Qurylystardyń qasbetteri, jaǵymdy áser syilap turýy tiis», - dedi ol.
Jobalaý uiymdarynyń direktorlary óńir basshysyna JSQ-ny daiyndaýdyń eń kóp merzimi jobanyń kúrdeliligine bailanysty 6-8 aidy quraitynyn jáne jii árqily málimettermen kezdesetindikterin jetkizdi. Óz kezeginde memlekettik saraptama basshysy jobalaýshylardyń qujattamany sapasyz daiyndaityndyqtaryn aityp shaǵymdandy.
«Bul oraida ýaqytyly jáne tiimdi jumys júrgizý kerek. JSQ daiyndaýdyń mundai qarqynyna qarap qarajatty igerýdiń tabystylyǵyna kúmán týady. Úlgi – jobalardy daiyndaýda jergilikti jerlerdiń erekshelikterin eskergen abzal. Jobalyq institýttardyń múmkindikterine taldaý jasaý kerek. Qurylys jumystaryna tartý úshin jumyssyzdar men ózin-ózi jumyspen qamtyǵandar tizimin qurý mańyzdy. Eki myńnan astam jobany júzege asyrý josparlanýda, sol úshyny jumys sáýir aiynan bastap qainaýy tiis», – dep óńir basshysy jaýapty tulǵalarǵa mindetter júktedi.
