Ár otbasynyń máselesi tyńǵylyqty qaralyp, tiisti kómek taǵaiyndalady. Bul týraly Úkimette ótken baspasóz máslihatynda Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy QazAqparat tilshisi.
Kómekke muqtaj otbasylardy qoldaýǵa ekpin qoiylatynyna toqtalǵan ministr, «Ol úshin jergilikti atqarýshy bilikpen jumys istep jatyrmyz, biz ár otbasyǵa jeke áleýmettik kartany ázirlemekpiz. Bul turǵyda otbasy músheleriniń jumyspen qamtylýy, olardyń tabys deńgeii, otbasydaǵy problemalar qamtylady. Osy kartanyń negizinde qoldaý kórsetý úshin kómekke eń muqtaj degen otbasylardy, azamattardy anyqtaimyz», - dedi ministr.
Sonymen qatar, B. Saparbaev Memleket basshysy biýrokratiiany tómendetýge qatysty tapsyrma bergenin eske saldy.
«Otbasylar ataýly áleýmettik kómekti alý úshin bir býma qaǵaz jinaidy, sondai-aq arly-berli mekemeler arasynda júredi. Sony azaitý úshin qazir bizde «E-Halyq» aqparattyq júiesi bar, sol arqyly tiisti jumystar iske asyrylady», - dedi ol.
Osy oraida, ol jumyspen qamtý ortalyqtary, aýyldar men aýdandardyń, qalalalardyń ákimdikteri qajetti qadamdardy atqaratynyn jetkizdi.
«Eger turǵyndardyń qujattary jetkiliksiz bolsa, sol qujattardy beretin memlekettik organdardan qajetti málimetterdi alyp, azamattarǵa tiisti kómekti taǵaiyndaityn bolady», - dedi B. Saparbaev.
