Premer-ministrdiń orynbasary Berdibek Saparbaev muqtajdyq sanatyna qaramastan, barlyq balaǵa nege 21 myń teńgeden berilmeitinin túsindirdi.
«Barlyq qazaqstandyq bir nárseni umytpaý kerek. Bul – ataýly áleýmettik kómek. Ol nashar turatyn otbasylardyń óziniń jaǵdaiyn jaqsartý úshin memleket tarapynan ýaqytsha beriledi. Bul - bir. Ekinshiden, kóptegen kezdesýde jergilikti turǵyndardan negizinen bul kómekti kópbalaly otbasylarǵa berý týraly ótinish boldy. Bizdiń negizgi ustanǵan qaǵidatymyz – kópbalaly otbasylardy qoldaý. Bes balaǵa qansha shyǵyn, bir balaǵa qansha shyǵyn ketetinin barlyǵyńyz jaqsy bilesizder. Al barlyǵyna 21 myń teńge tóleý degen durys emes. Sebebi, birinshiden, biz oǵan ketetin qarjyny esepteýimiz kerek. Eń negizgi másele – biz muqtaj adamdarǵa kómek berýimiz kerek», - dedi Berdibek Saparbaev OKQ-da ótken baspasóz máslihatynda.
Úkimet basshysynyń orynbasary Prezidenttiń «masyldyq pen muqtajdyqty ajyrata bilýimiz kerek» degen sózin eske saldy.
«Bizdiń oiymyzsha, sońǵy kezdesýler kezinde negizgi jerlerde muny halyqtyń bári durys qabyldady. Jalpy qazaqstandyqtardy jumysqa úiretýimiz kerek. Árkim óziniń otbasyn ózi asyraýy kerek», - dedi Berdibek Saparbaev.
Eske sala ketsek, buǵan deiin Berdibek Saparbaev jańa mehanizm boiynsha ataýly áleýmettik kómek 367 myń otbasyna berilip jatqanyn málim etken bolatyn.
