Búgin Memleket basshysynyń tapsyrmasymen Qazaqstan Respýblikasynyń Premer-Ministri Asqar Mamin Aqtóbe oblysy máslihatynyń kezekten tys sessiiasyna qatysty, dep habarlaidy "Ult aqparat".
A. Mamin máslihat depýtattaryna Memleket basshysynyń O. Orazalin kandidatýrasyn Aqtóbe oblysynyń ákimi laýazymyna usyný týraly hatyn oqyp berdi. Depýtattar QR Prezidenti usynǵan kandidatýrany biraýyzdan qoldady.
"Elbasynyń Jarlyǵy boiynsha Berdibek Saparbaev Aqtóbe oblysy ákimi qyzmetinen bosatylyp, Eńbek jáne halyqty áleýmettik qorǵaý ministri bolyp taǵaiyndaldy. Berdibek Máshbekuly osy oblysty 4 jylǵa jýyq basqardy. Aqtóbe oblysynyń áleýmettik-ekonomikalyq damýyna úlken serpin berildi. Jańa áleýmettik nysandar, infraqurylym jobalary iske asyryldy. Berdibek Máshbekulyna óńirdiń qarqyndy damýy jáne ekonomikasynda atqarǵan jumysy úshin alǵys bildiremiz. Qazirgi tańda Memleket basshysy áleýmettik salany jańǵyrtý boiynsha asa mańyzdy maqsat, mindetter belgilep otyr. Osy mańyzdy mindetti iske asyrýdy Berdibek Máshbekulyna tapsyryp otyr", - dedi Premer-Ministr Asqar Mamin.
Óz kezeginde Berdibek Saparbaev aqtóbelikterge alǵys aitty.
"Óz taǵdyryma rizamyn. 30 jylǵa jýyq Memleket basshysynyń qasynda, seniminde kele jatyrmyn. Qazir maǵan taǵy úlken senim artyp otyr. Elbasyna raqmet aitamyn. Bul senim ári úlken jaýapkershilik. Men tájiribemdi, bilimimdi senimdi aqtaýǵa jumsaimyn. Halyqtyń turmysyn, jaǵdaiyn jaqsartýǵa eńbek etemin. Al aqtóbelikterge raqmet aitamyn. Qoldap, kómektestińizder. Qoldaý, kómek bolmasa úlken is bitpes edi", - dedi B. Saparbaev.
Al Ońdasyn Orazalin úlken senimdi aqtóbeliktermen birge aqtaýǵa ýáde berdi.
"Kindik qany tamǵan jerine, halqyna qyzmet etý erekshe mártebe, ekinshiden qiyndyǵy men jaýapkershiligi bar jumys. Elbasy senim bildirgen soń senimdi aqtaýǵa kúsh- qairatymyzdy jumsaimyz. Abyroi ortaq", - dedi Ońdasyn Orazalin.
