Foto: kolesa.kz
QR Energetika ministriniń mindetin atqarýshy Bolat Aqsholaqov benzin men dizel otyny baǵasynyń ósýi azyq-túlik qunyna qalai áser etetine týraly suraqqa jaýap berdi, dep habarlaidy QazAqparat agenttigi.
«Janarmai baǵasynyń infliatsiiaǵa yqpaly máselesine toqtalsaq, biz baǵany eki ese kóterip jatqan joqpyz. Biz benzindi (AI-92 jáne AI-93) 11 paiyzǵa, dizeldi 20 paiyzǵa kóterip jatyrmyz. Meniń oiymsha, janar-jaǵarmai baǵasynyń ósýi taýar qunyna qosatyn úlesi shyn máninde asyra kórsetilip otyr. Sebebi 2021 jylǵy jáne 2022 jylǵy statistikany qarasaq, janarmai baǵasy ózgergen joq. Biraq osy ýaqyt aralyǵynda taýar baǵasyna basqa faktorlar áser etti», - dedi Aqsholaqov Ortalyq kommýnikatsiialar qyzmetindegi baspasóz máslihatynda.
Onyń paiymynsha, taýar baǵasyna qatysty eleýli ósim bolmaidy.
«Atap aitqanda, bul baǵytta tiisti qadaǵalaý kerek. Árine, qandai da bir ósim bolady. Biraq munyń bári josparlanǵan infliatsiia sheginde bolady dep oilaimyn», - dedi ministrdiń mindetin atqarýshy.
Aqsholaqovtyń sózine qaraǵanda, taksi qyzmeti qymbattaýy múmkin.
«Biraq benzin 11 paiyzǵa qymbattasa, taksiler de qyzmet qunyn 11 paiyzǵa kóterý kerek degendi bildirmeidi», - dedi ol.
Aita keteiik, Qazaqstanda benzin men dizel otynynyń baǵasy ósedi. Osy oraida tiisti buiryqtyń jobasy búgin jariialanady.
