Munai baǵasynyń tómendeýi aiasynda Qazaqstanda benzin baǵasy qalai qubylýy múmkin? Bul suraqqa Úkimet otyrysynan keiin tilshilerdiń aldynda Energetika ministri Nurlan Noǵaev jaýap berdi, dep habarlaidy "Ult aqparat".
«Benzinniń baǵasy erkin ainalymda. Bárin naryqtyq sharttar retteidi. Qazaqstan óziniń munai óndirisin qysqarta ma, ulǵaita ma degen suraqqa keler bolsaq, ózimizdiń bul baǵytta naqty josparlarymyz bar. OPEK-tiń ustanymdary – bizge usynys retinde ǵana kelip otyr. Al qazirgi tańda bizde jospardy ózgertetin oi joq», - dedi Nurlan Noǵaev.
Energetika ministri qazirgi ýaqytta Qazaqstanda benzin baǵasy turaqty ekenin aityp ótti.
«Benzin baǵasy birneshe jyldan beri erkin naryqta. Usynys pen suranystyń nátijesinde rettelip kele jatyr. Oǵan qajet janar-jaǵarmai qory jetkilikti. Elimizdegi barlyq munai óńdeý zaýyty shtatty túrde jumys istep jatyr», - dedi ol.
