Aldyn-ala baǵalaýlar boiynsha, 14-16 shildede Belgiiada sońǵy 100 jylda bolǵan eń aýyr sý tasqynynan keltirilgen zalal 10 mlrd eýrodan asady, dep habarlaidy RTL-TVI telearnasy.
«Sý tasqynynan aldyn ala keltirilgen zalaldy Valloniia (Belgiianyń ońtústik franktildi aimaǵy) úkimeti baǵalaidy, ol qazirdiń ózinde 10 milliard eýrodan asady», - dep atap ótti telearna.
Aptanyń basynda Valloniia úkimeti aimaqty qalpyna keltirýge 2 milliard eýro kólemindegi kómek kórsetý shuǵyl josparyn qurý týraly jariialady. Bul jospar úshin 800 mln eýro koronavirýs pandemiiasynan keiin aimaqty qalpyna keltirýge baǵyttalǵan Valloniia ekonomikasyn qoldaýdyń basqa josparynan aýdarylatyn bolady. Sondai-aq, aimaq úkimeti Eýroodaqtan qosymsha kómek kútetinin málimdedi.
Beisenbi kúni tańerteńgi resmi málimetter boiynsha, Belgiiadaǵy nóser jańbyr saldarynan bolǵan sý tasqynynan 32 adam kóz jumǵan, olardyń barlyǵy anyqtaldy, al 18-i habar-osharsyz ketken. On myńnan astam úi qirap, búlingen, osy ýaqytqa deiin 1,5 myńǵa jýyq úi sýsyz, 10,5 myń úi elektr jaryǵynsyz jáne 10 myń úi gazsyz qaldy.
