Qazaqstan Respýblikasy Táýelsizdiginiń 30 jyldyǵyna orai, Belgiianyń «SINEMATEK» koroldik kino óneri ortalyǵynda «Tomiris» filminiń arnaiy kórsetilimi ótti, dep habarlaidy QazAqparat.
Qazaqstan Respýblikasynyń Belgiiadaǵy Elshiliginiń habarlaýynsha, sharany Frantsiiadaǵy Qazaqstan kinosy qaýymdastyǵynyń qoldaýymen Belgiia, Liýksembýrg jáne Frantsiiadaǵy Qazaqstan kinosy aptalyǵy aiasynda qazaqstandyq diplomattar uiymdastyrǵan.
Sanitarlyq shekteýlerge qaramastan, qazaqstandyq kinematografiiaǵa degen qyzyǵýshylyq joǵary boldy. Eki jylda birinshi ret kórsetilim oflain-formatta ótip otyr.
Shara qonaqtary arasynda Eýrokomissiianyń Eýropalyq syrtqy bailanystar qyzmeti, Eýropalyq Parlament, NATO, Briýssel qalasyndaǵy diplomatiialyq korpýs qyzmetkerleri jáne ózge de resmi tulǵalar boldy.
Alaida kelýshilerdiń basym bóligi jergilikti turǵyndar men qazaqstandyq diaspora ókilderi boldy. Olar elimizdiń Táýelsizdik jyldary jetken ekonomikalyq jáne mádeni-gýmanitarlyq damý salasyndaǵy jetistikterine arnalǵan sýretter kórmesin tanysty.
Shara qonaqtaryn qarsy alý kezinde Qazaqstannyń Belgiiadaǵy Ýaqytsha Senimdi ókili Jandos Buhbantaev 30 jylda Qazaqstannyń ekonomika, mádeniet jáne syrtqy saiasatta aitarlyqtai jetistikterge jetkenin atap ótti. Qazaqstan Eýropalyq Odaq jáne Eýropanyń ózge de elderimen senimdi jáne ózara tiimdi qarym-qatynastar qurdy. J. Buhbantaevtyń aitýynsha, «Tomiris» kartinasy arnaiy tańdaldy – sebebi film qazaq jerinde tirshilik etken ejelgi taipalardyń bai tarihyn kórsetip qana qoimai, sonymen qatar kartina avtorlarynyń basty ideiasy – birlik pen patriotizmdi saqtaý men qazaq memlekettiligin nyǵaitýdyń mańyzyn baiandaidy.
Qazaqstan kinosy qaýymdastyǵynyń jetekshisi Andrei Ivanov, sonymen qatar Tomiristiń ápkesiniń rólin somdaǵan Aijan Irgalieva kórermenderge zamanaýi qazaqstandyq kino ónerine qyzyǵýshylyq tanytqany úshin alǵysyn bildirdi. Qazaq kinosy eýropalyq kinomandar arasynda tanymal bolyp keledi.
CINEMATEK – Belgiia astanasyndaǵy kinofestival ótkizýge arnalǵan iri ortalyq. Munda 1938 jyly Anri Shtork, Andre Tirifeis jáne Pitom Vermeilen negizin qalaǵan koroldik filmder beineqory ornalasqan, ishinde 180 000 kóshirme men 85 000 negativ saqtalǵan. Kino aptalyǵy aiasynda 2021 jyldyń 15 jeltoqsany kúni Liýksembýrg kórermenderi «Kinepolis» iri kinoteatrynda Kann festivaliniń laýreaty aktrisa Samal Esliamova túsken «Ýaqyt joldary» filmin tamashalai alady.
