Ótpeli úkimette bir jylǵa jýyq premer-ministrdiń mindetin atqarǵan Belgiianyń Syrtqy ister ministri Sofi Vilmes qarqyndy terapiia bólimine jatqyzyldy, dep habarlaidy "Ult aqparat".
Ótken aptada onyń koronavirýstyń bar-joǵyn anyqtaý úshin tapsyrǵan testisi infektsiiany anyqtaǵan bolatyn. Belgiianyń forin keńsesi ókilderiniń málimetinshe, 45 jastaǵy saiasatker esin biledi jáne sóilei alady. Jaǵdaiy – turaqty.
Belgiia úkimetiniń basshylyǵyna úsh apta buryn kelgen koroldiktiń qazirgi premer-ministri Aleksandr de Kroo Vilmestiń tezirek jazylyp ketýin tiledi.
Ótken aptada Vilmes infektsiiany otbasy adamdarynyń birinen juqtyrýy múmkin ekenin málimdegen. Sebebi úiden tys jerde, taza aýada ol barlyq qaýipsizdik sharalaryn saqtaǵan.
11,5 mln-nan sál ǵana asatyn turǵyny bar Belgiia COVID-19 pandemiiasy bastalǵaly Eýropa elderiniń ishinde eń kóp zardap shekkender qatarynda. Qazir elge koronavirýstyń jańa tolqyny kelgen. Ótken aptada kún saiyn 10 myń jańa juqtyrý oqiǵasy tirkelip, ortasha eseppen bir kúnde 33 adam qaitys bolyp otyrǵan.
