Belgiianyń aqparat quraldarynyń habarlaýynsha, Belgiia prokýratýrasy qazaqstandyq "Astana Pro Team" komandasynyń veloshabandozy Aleksandr Vinokýrov pen reseilik Aleksandr Kolobnevti alty aiǵa bas bostandyǵynan aiyrýdy suraǵan.
Bul eki sportshyǵa 2010 jyly sáýir aiynda bolǵan "Lej – Baston – Lej" velojarysy kezinde "sybailas jemqorlyq qylmysyn jasady" degen aiyp taǵylǵan.
Belgiialyq RTBF.be saitynyń jazýynsha, prokýratýra ókilderi Aleksandr Vinokýrovty "jeńiske talaspaýy úshin Kolobnevke 150 myń eýro bergen" dep aiyptaidy. Olar sportshylardyń ózara almasqan elektrondy hattaryna súienedi. Prokýratýra buǵan qosa, Vinokýrovtyń 2010 jyly shilde men jeltoqsan ailary aralyǵynda 100 myń jáne 50 myń eýro aralyǵynda aqsha aýdarǵany týraly bank anyqtamasyn dálel retinde keltiredi.
Al sportshylardyń advokattary aiyptyń negizsiz ekenin, prokýratýra keltirgen derekterdiń zańsyz jolmen alynǵanyn (olardyń bir bóligi aiyptalýshylardyń elektrondy jáshiginen alynǵan) nemese qoldan uiymdastyrylǵanyn aitady.
Belgiia prokýratýrasy bas bostandyǵynan aiyrý jazasynan bólek, Vinokýrovqa - 100 myń eýro, Kolobnevke - 50 myń eýro kóleminde aiyppul salýdy surap otyr. Buǵan qosa, "Kolobnev zańsyz jolmen alǵan 150 myń eýrony" kámpeskeleýdi de suraǵan.
Sot úkimi Lejde 8 qazanda oqylady.
