Belgiianyń Lej provintsiiasyndaǵy Varemm aimaǵynyń turǵyny Belgiia premer-ministri Aleksandr de Kroony óltiremin dep qorqytqannan keiin qamaýǵa alyndy, dep habarlaidy "Ult aqparat".
«Men gazetterdiń basty betine shyǵamyn. Muny jalǵyz jasamaimyn. Men seni kútemin, De Kroo», - dep jazǵan belgisiz er adam Belgiia premer-ministriniń elektrondy poshtasyna.
Belgiialyq BAQ-tyń habarlaýynsha, er adamdy federaldy politsiianyń terrorizmge qarsy bólimi dereý ustaǵan. Quqyq qorǵaý organdary onyń kásipker ekenin anyqtady. Ustalǵan adamnyń biznesine eldegi qabyldanǵan shekteý sharalary keri áserin tigizgen.
Ministrler kabineti basshysyna jazǵan hatynda er adam onyń kompaniiasyn qurdymǵa ketirgen koronavirýspen kúres sharalaryna shaǵymdanǵan. Sondai-aq ol kóptegen adamnyń atalǵan talaptardy saqtamaitynyn jazǵan. Hatty ashýlanyp joǵaryda kórsetilgendei qoqan-loqqylarmen aiaqtaǵan.
Osy áreketinen keiin kásipkerdi qaýipsizdik qyzmetkerleri óz úiinde tutqyndady.
Eske sala keteiik, qazirgi ýaqytta Belgiiada pandemiianyń «ekinshi tolqynyn» toqtatýǵa arnalǵan qatań shekteýler bar. Azyq-túlikten basqa dúkender jabyldy, kásiporyndardyń kópshiligine qashyqtan jumys isteý týraly nusqaý berildi.
Erteń Belgiia Úkimeti «lokdaýnǵa» qatysty qazirgi jaǵdaidy qarastyratyn otyrys ótkizedi jáne keibir shekteýlerdi «jeńildetý» týraly sheshim qabyldanýy múmkin.
