Filologiia ǵylymdarynyń doktory, professor Álimhan Júnisbek dúnieden ozdy. Qaraly habardy Ahmet Baitursynuly atyndaǵy til bilimi institýtynyń direktory Anar Fazyljanova rastady.
«Mynaý indet irilerdi jalmap barady…Til biliminiń tarlany, professor Álimhan Júnisbek aǵamyzdan aiyrylyp qalyppyz… Ǵalymnyń qazasy - ǵalamnyń qazasy degen, qandai orny tolmas ókinish… Baqul bolyńyz, aǵa. Alla panasyna alsyn! Otbasyna, jaqyndary men týystaryna, ujymy men shákirtterine kóńil aitamyn», - dep jazdy áleýmettik jelide Halyqaralyq Túrki akademiiasy prezidenti Darhan Qydyráli.
Álimhan Júnisbek 1938 jyly Túrkistan oblysynda týǵan.
QazMÝ-dyń filologiia fakýltetin 1963 jyly bitirgen. 1964 jyldan Qazaqstan ǵylym akademiiasy Ahmet Baitursynuly atyndaǵy Til bilimi institýtynda kishi ǵylymi qyzmetker, aǵa ǵylymi qyzmetker, bólim meńgerýshisi, bas ǵylymi qyzmetker bolyp jumys istedi.
Álimhan Júnisbek qazaq fonetikasyna, orfografiia men orfoepiia máselelerine, singarmonizm teoriiasyna eńbek sińirgen ǵalym.
Ol túrki jáne qazaq tiltanymyndaǵy sózquraýysh máselesi, qazaq tilindegi singarmonizm zańy, qazaq tiliniń artikýliatsiialyq bazasy quramyndaǵy artikýliatsiialyq úlgiler, qazaq tilindegi býyn jáne morfemanyń dybys quramy men jelisi, latyn álipbiine kóshý máseleleri, qazaq tilin ózge ult ókilderine úiretý ádistemesi máselelerimen ainalysqan.
Ǵalym 2007 jyly Qazaqstan Respýblikasy bilim jáne ǵylym ministrliginiń "Qazaqstan Respýblikasynyń ǵylymyn damytýǵa sińirgen eńbegi úshin" tósbelgisimen, "Eren eńbegi úshin" medalimen marapattalǵan.
