Belgili filolog-ǵalym Sultan Orazalin baqiǵa attandy, dep habarlaidy "Ult aqparat".
Aqparat jáne qoǵamdyq damý ministri Aida Balaeva ǵalymnyń qaitys bolýyna bailanysty marqumnyń otbasy men týǵan-týysyna kóńil aitty.
«El rýhaniiaty taǵy bir tarlanynan aiyryldy. Alashtyń ardaqtysy, til janashyry, belgili filolog-ǵalym, qazaq radiosy men televiziiasyna erekshe eńbegi sińgen asyl aǵamyz Sultan Orazalin dúnie saldy. Sanaly ǵumyryn qazaqtyń ádebieti men mádenietin dáriptep, týǵan tiliniń tuǵyryn, ultynyń ulyq múddelerin tý etken esil tulǵa artyna alty urpaqqa azyq bolar shyǵarmashylyq úles pen ǵylymi mura qaldyryp ketti. Táýelsizdiktiń tańynda tái-tái basqan jańa eldiń igiligine qyzmetke kelip, jas memlekettiń ulttyq órisin keńeitýge bilek sybana kirisken Sultan aǵamyz jyldar óte Úkimet pen Prezident janyndaǵy túrli alqalardyń ainymas múshesi, aqylman abyzyna ainaldy. Otandyq til saiasaty, óner men mádeniet máselelerine qatysty qundy ǵylymi izden isteri men kesek oily shyǵarmalary óskeleń urpaqtyń ilim-bilimine qosylǵan úlken miras edi.
Amal qansha…ajalǵa arasha joq. Dese de, uly tulǵanyń osynaý ulyq joly men ónegesi onyń ómiriniń rýhani jalǵasy bop máńgilikke el esinde qalady. Jatqan jerińiz jaryq, imanyńyz berik, topyraǵyńyz torqa bolsyn, asyl aǵa!
Osynaý qaiǵyǵa ortaqtasyp, marqumnyń otbasy, týǵan-týystaryna kóńil aitamyn», - dep jazdy Aida Balaeva jelidegi paraqshasynda.
