Saryaǵash medrese kolledjiniń direktory, belgili ustaz Ábdiǵappar Smanov qaitys boldy. Bul jaiynda Qazaqstan musylmandary dini basqarmasynyń baspasóz qyzmeti habarlady.
"Saryaǵash medrese kolledjiniń direktory Ábdiǵappar Smanov 2020 jyldyń 1 shildesinde tańǵy saǵat 07:45-te qaitys boldy", - delingen aqparatta.
Oǵan arteriialyq qysym, gipertoniialyq daǵdarys, qant diabeti, pnevmoniia diagnozy qoiylǵan.
"Smanov "Salma Karavan" shipajaiynda em alyp jatqan. Lai qoidyryp, aiaǵyn kúidirip alǵan. Aýrýhanaǵa aýyr halde túsken. Rentgenge túsirgende pnevmoniia anyqtalǵan", - dep naqtylady QMDB.
"Ábdiǵappar Shákiruly qazaq topyraǵyndaǵy islam dininiń gúldenýi jolynda eleýli eńbek atqardy. QMDB-nyń respýblikalyq aqparattyq nasihat toby quramynda elimizdiń birqatar aimaǵynda bolyp, jurtshylyqpen júzdesip, asyl dinimizdiń nasihatshysyna ainaldy", - delingen dini basqarmanyń resmi saitynda.
Ábdiǵappar Smanov 1970 jyly 22 aqpanda Túrkistan oblysynyń Saryaǵash aýdanynda dúniege kelgen.
1990-1994 jyldary Bekabad qalasyndaǵy "Maǵrifat" medresesinde (Ózbekstan) dini bilim aldy.
1994 jyldan bastap "Taiaqty Eshan" meshitiniń bas imamy boldy jáne meshit janyndaǵy "Ýbai ibn Kaab" medresesinde ustazdyqty qatar alyp júrdi.
2010-2016 jyldary Saryaǵash medrese-kolledji direktorynyń orynbasary, 2016 jyldyń jeltoqsanynan bastap medrese-kolledjdiń direktory qyzmetin atqardy.
