Almaty qalalyq politsiia departamenti 16 qańtarda áleýmettik jelilerge júrgizgen monitoring barysynda «Hongqi» markaly kóliginiń júrgizýshisi jol qozǵalysy erejelerin buzǵanyn anyqtady, - dep habarlaidy "Ult aqparat".
"Quqyq buzýshyǵa qaýipsizdik beldikterin paidalaný jáne kólik quralyn mindetti saqtandyrý shartynsyz júrgizý erejelerin saqtamaǵany úshin ákimshilik hattamalar toltyryldy.
Sonymen qatar júrgizýshimen aldaǵy ýaqytta jol qozǵalysy erejelerin buzbaý jóninde quqyqtyq-túsindirme áńgime júrgizildi" - delingen qalalyq PD habarlamasynda.
Al jeli qoldanýshylary aiyppul arqalaǵan tanymal aktrisa ári prodiýser Quralai Anarbekova ekenin jarysa jazdy.
"Bul oqiǵanyń bolǵany ras. Túsirilimge bola rýlge 15 sekýnd otyrdym. Videony áleýmettik jelige salǵan men emes edim, qazir bul video joǵalyp ketti. Men kólik júrgizbeimin, júrgizýshim bar. Rýlge otyrǵannan keiin qaýipsizdik beldigin taǵýdy umytyp ketippin. Aiyppuldy tóledim", – dedi aktrisa Tengrinews.kz saitynyń tilshisine.
Sondai-aq óner iesi basynan ótken qatelik basqalarǵa sabaq bolǵanyn da aitty.
"Kóliktiń iesi – ózim. Biraq ony sirek júrgizemin. Bul oqiǵa meniń komandama sabaq boldy. Men zańdy buzbaimyn. Bizdiń organdardyń qalai jumys isteitinin kórip, riza boldym. Endi qaitalamaimyn. Baǵdarshamǵa baǵynyp, beldikti taǵyp, jol erejesin saqtap júrińizder", – dedi ol.
