Qazaqstandyq advokat, ulttyq qoǵamdyq senim keńesiniń múshesi Aiman Omarova memleket basshysy Qasym-Jomart Toqaevtan Túrkistan oblysynda zorlanǵan 13 jasar balanyń isine aralasýdy surady, dep habarlaidy Sputnik Qazaqstan tilshisi.
Prezidenttiń qatysýymen ótken ulttyq qoǵamdyq senim keńesiniń otyrysynda advokat Aiman Omarova adam zorlaý máselesin kóterdi. Aitýynsha, ol qazir zorlanǵan 9 balanyń isin qarap jatyr. Osy oraida keńes múshesi sol isterdiń bir-ekeýin mysalǵa keltirdi.
"Saryaǵash aýdanyndaǵy internatta on úsh jasar balany bir jyl boiy zorlaǵan. Ony balalar "tesik" dep ataǵan. Jyǵylǵanǵa judyryq dep, Túrkistan oblysynyń soty zorlaǵan balany aqtap jibergen. Óitkeni internatty japqysy kelmeidi. Osy máselege kóńil aýdarýyńyzdy suraimyn", - dedi Omarova Qazaqstan prezidentine.
Advokat Arqalyq irgesindegi aýylda bolǵan jaǵa ustatarlyq oqiǵany aityp berdi.
"Kishkentai aýylda 14 er adam bir qyzdy zorlaǵan. Qazir ol ispen ne bolyp jatqanyn bilmeimiz. Al qyz bosanyp aldy. Politsiia kinálilerdi qamaǵan da joq. Endi halyqtyń sońǵy úmiti – sot. Bári de sot ádiletti bolsa eken dep oilaidy", - dedi Omarova.
Onyń pikirinshe, halyqtyń sot júiesine senimi azaiǵan, sondyqtan bul salaǵa ózgerister qajet.
"Sotta tek adal, kásibi mamandar otyrýy kerek", - dedi keńes múshesi.
Budan bólek, advokattyń pikirinshe, adam zorlaý isimen ainalysatyn arnaiy departamentter qurý qajet.
Aita keteiik, Nur-Sultanda prezident janyndaǵy ulttyq qoǵamdyq senim keńesiniń alǵashqy otyrysy ótti. Keńes biyl maýsymda Toqaevtyń jarlyǵymen qurylǵan bolatyn.
