Abaitanýshy, filologiia ǵylymdarynyń kandidaty Omar Jálel Tarazdaǵy Nazarbaev ziiatkerlik mektebinde oqýshy qyzdardy oqýǵa emes, bala týýǵa shaqyrǵan. Bul týraly ol qazaqtyń uly oishyly Abai Qunanbaiulynyń ómiri men shyǵarmashylyǵyna arnalǵan dáris kezinde aitqan, dep habarlaidy SputnikNews.kz.
"Qyz balanyń muraty – ómir boiy oqyp, "akademik-doktor" bolý emes, jastaiynan bes zárýdi boiyna sińirip, "akademik-doktorlardy" týyp, tárbieleý. Qyz degen marker ǵoi. Ol jazbai qalsa, biz ne isteimiz? Álbette, tastai salamyz", - degen Jálel dáris oqý barysynda.
Abaitanýshynyń bulai deýi oqýshy qyzdardyń ashýyn týǵyzdy.
Tipti 11-synyp oqýshysy Aiaýlym Qanatbek áleýmettik jelide post jazyp, Jáleldiń sózimen kelispeitinin bildirgen. Ol áielderdi óz quqyqtaryn qorǵaýǵa shaqyrdy.
Oqýshy qyzdyń pozitsiiasyn bilim berý uiymynyń ákimshiligi de qoldap otyr.
"Nazarbaev ziiatkerlik mektepteri" derbes bilim berý uiymy Taraz qalasyndaǵy ziiatkerlik mekteptiń 11-synyp oqýshysy Aiaýlym Qanatbektiń ustanymyn qoldaidy jáne onyń Instagram jelisindegi qyzdardyń zamanaýi qoǵamdaǵy missiiasy týraly jazbasymen kelisedi", - dep málimdedi NZM óńirlik filialynan.
Aita ketsek, Omar Jálel qazaqstandyqtarǵa shýly málimdemelerimen tanymal. Abaitanýshynyń suhbattary qazaq tildi BAQ betterinde jii jaryq kórip turady. Máselen, jýyrda ol qyzdardy taýarǵa teńep, eldiń talqysyna tústi.
